ಆರಿದಾರಿದು ಕರಿಯ ಅಂಚಿನ
ಬಿಳಿಯ ಸೀರೆಯ ಕನ್ನೆಯು
ತುಂಬು ಜವ್ವನವನ್ನೆ ಬಿಂಬಿಪ
ನುಣುಪು ಕೆನ್ನೆಯ ಚೆನ್ನೆಯು?
ಕರಿಯ ಮೋಡದ ಮೇಲೆ ಥಟ್ಟನೆ
ಸುಳಿದು ಮೆರೆಯುವ ಮಿಂಚೊಲು
ಕಾಡಿಗೆಯ ಕಣ್ತುದಿಯೊಳಹಹಾ!
ಕಣ್ಣಮಿಂಚಿನ ಗೊಂಚಲು!
ಕಂಗಳೆಸೆಯುವ ಮಿಂಚಕುಡಿಗಳ-
ನೆಲ್ಲವೊಂದೆಡೆ ಹೀರುತ
ಕೂಡಿಸಿಟ್ಟೊಲು ನತ್ತು ಮೂಗಿನೊ-
ಳಿಹುದು ನಗೆಯನು ಬೀರುತ!
ಪ್ರೇಮ-ಸರದೊಳು ಕೊಂಕುನಗೆಗಳ-
ನೊಯ್ವ ದೋಣಿಯು ಚೆಂದುಟಿ!
ಮುಂದೆ ಬರಲಿಹ ಮುತ್ತುಗಳ ನೆನೆ-
ದಿಂದೆ ನಾಚಿದೆ ಕೆಂದುಟಿ!
ರತಿಗೆ ಚೆಲುವೊಳು ರತಿಯೆ ಸಾಟಿಯು;
ಬೆಲ್ಲದೊಲೆ ಸವಿ ಬೆಲ್ಲವು;
ಅಂತೆಯೀಕೆಯ ಚೆಲುವು ಮಾಟಗ-
ಳೂಟೆಯೆನಿಪೀ ಗಲ್ಲವು!
ಮದನ ಮಾಲಿಯು ರವಿಕೆ ಬೇಲಿಯು
ಜನರ ಮನಗಳೆ ಹೊಲಗಳು!
ತುಂಬಿದೆದೆಗಳು ದೇಹ-ಲತೆಯೊಳು
ಬಿಟ್ಟ ಸುಮಧುರ ಫಲಗಳು!
ಕಾಣೆನೇತಕೊ ನಗುತಲಿರುವಳು
ಅದೆಕೊ ಕದಪೊಳು ಕುಳಿಗಳು-
ಮನವ ಸೆಳೆಯುತ ಮೋಹದಾಳಕೆ
ತಳ್ಳಲೆಳಸುವ ಸುಳಿಗಳು!
ಇಂಥ ಚೆಲುವೆಯು ಮತ್ತೆ ಸಿಕ್ಕಳು
ಎನುತಲವಳನು ಅಪ್ಪಲು
ಮುಂದೆ ನುಗ್ಗಲು ಕನಸು ಒಡೆದುದು;
ಕಣ್ಗೆ ಕವಿದಿತು ಕತ್ತಲು!
*****
