ತಂತಾನೆ ನೋಡಿಕೊಂಡರೆ?

ಎಲೆಲ್ಲೆಲ್ಲಿ ನೋಡಿದರೂ ಎಲ್ಲಾರೂ ಕಾಣಿಸ್ತಾರೆ, ನಾನೇ ಮಾತ್ರ ಕಾಣ್ಸೋದಿಲ್ಲ|
ನಾನಿದ್ದದ್ದೇ ಸುಳ್ಳೋ? ಹೇಳಾಕಿಲ್ಲ.
ಇದ್ದೇನೆಂದ್ರೂ-ಇದ್ದಾಂಗಿಲ್ಲ| ಏಸು ವರ್ಷ ಕಳೆದ್ರೂ ಬೆಳದ್ಹಾಂಗಿಲ್ಲ |
ಬುದ್ಧಿಯಂತೂ ಬರಲೇ ಇಲ್ಲ| ಹೋಗಿದ್ರೇ ಬರಬೇಕಲ್ಲ|
ಹೋದ ಬುದ್ಧಿ ತಿಂದ ಮುದ್ದಿ ಬರೋದುಂಟೇ?
ಬರತಽದಂದ್ರೆ ಬೇರೇ ದಾರಿಗುಂಟೇ ||

ಹೀಚು ಹೋಗಿ ಮಿಡಿ ಆಯ್ತು | ಕಾಯಿ ಹೋಗಿ ಹಣ್ಣು ಆಯ್ತು |
ಬದಲೀ ಬಣ್ಣೇ ಬರಲಿಲ್ಲ| ರುಚಿಯೇನೋ ತರಲಿಲ್ಲ|
ಹಳೇದಾದ್ರು ಹುಳಿ ಹೋಗಲಿಲ್ಲ | ಪಾಡುಗೊಂಡು ಮಧುರಾಗಲಿಲ್ಲ|
ಹಣ್ಣೆಂದು ಕರೆಯೋದ್ಹ್ಯಾಂಗ ಹುಣಸೀಕಾಯಿಗೆ ?
ಕಸುಕಿದ್ರು ಹುಣಸಿನಕಾಯಿ, ಹಣ್ಣಾದ್ರು ಹುಣಸಿನಕಾಯಿ
ಯಾಕೆಂದು ಕೇಳಬೇಡಿ ಹಾಕಿನೋಡಿ ಬಾಯಿಗೆ! ||

ಇದ್ದ ಗುಣ ಇದ್ದೇ ಇತ್ತು | ಬಣ್ಣ ಮಾತ್ರ ಬದಲಾಗಿತ್ತು|
ಸಕ್ರಿಮಾತ್ರ ಬೆರೀಲಿಲ್ಲ ಹುಳಿಹುಳಿ ಜೊಂಡಿಗೆ|
ಮೈ ಆಯ್ತು ಮೆತ್ತಗೆ | ಆಯುಷ್ಯ ಬಂತು ಹತ್ತೆಗೆ|
ಗುಣಾ ಹೋಗದಿದ್ರೆ ಈಡುಮಾಡಬೇಕು ಗುಂಡಿಗೆ ||

ತೆಂಗಿನಕಾಯಿ ಇನ್ನೊಂದು ಜಾತಿ | ದಿನಗಳೆದಂತೆ ಬಿರುಸಾಗತೈತಿ |
ಅಂಬವರುಂಟು ಹುಣಸಿಹಣ್ಣು | ಅಂದವರುಂಟೆ ತೆಂಗಿನಹಣ್ಣು? ||

ತೊಂಗಲಿಲ್ಲ ತಿಸಿಲಿಲ್ಲ ಮರ ಬೆಳೀತು ಮುಗಿಲಿಗೆ |
ಇಳಿದು ಬರುವ ಎಣಿಕೀ ಹಾಕದೆ, ಕಾಯಿ ಏರಿತು ಚಂಡಿಗೆ |
ನೇಣುಹಾಕಿ ನೇತಾಡುವನು ಜಿಗಿದು ಬಿದ್ರೆ ಭೂಮಿಗೆ|
ಸೀಳಿ ಹೋಗಬೇಕು, ಸೋರಿ ಹೋಗಬೇಕು ಸಾವಿಗೆ ||

ತಿನ್ನೋದೇನು ಸುಲಭವಲ್ಲ ತೆಂಗಿನಕಾಯಿ
ಜುಟ್ಟು ಕಿತ್ತಿ ಪರಟೇ ಒಡೆದು ತಗೀಬೇಕು ಬಾಯಿ ||
ಹಲ್ಲು ತಗೀದಿದ್ರೆ ಆಗಬೇಕಾಗ್ತಾದ ನಾಯಿ
ಹೈರಾಣಕಂಜಿ ಬಿಡೂದಕ್ಕಿಂತ ಹೆಚ್ಚುತಿಂದು ಸಾಯಿ ||

ತೆಂಗಿನ ಹಾಗೆ ಬಿರುಸು. ಹುಣಿಸೆಯಂತೆ ಹುಳುಚು |
ನನ್ನ ರುಚಿ ನನಗೇ ಬೇಡ | ಹೆರವರಿಗಂತೂ ಮೊದಲೇ ಬೇಡ ||
ಇದ್ದ ಕಣ್ಣು ಮುಚ್ಚಿಕೊಂಡು ತಂತಾನೆ ನೋಡಿಕೊಂಡರೆ
ಕಾಣಿಸ್ತೇನೋ ಕಾಣೊದಿಲ್ಲೋ ನೋಡಬೇಕು ಹಾಗಾದರೆ ||
*****

Leave a Reply

 Click this button or press Ctrl+G to toggle between Kannada and English

Your email address will not be published. Required fields are marked *

Previous post ನವಾಬಿ ಮಲ್ಲಿಗಿ ಹೂವಿನ ಗಜರಾ
Next post ನಗೆ ಡಂಗುರ – ೬೧

ಸಣ್ಣ ಕತೆ

  • ಪ್ಲೇಗುಮಾರಿಯ ಹೊಡೆತ

    ಪ್ರಕರಣ ೧೩ ಕೆಲವು ದಿನಗಳ ತರುವಾಯ ತಿಪ್ಪೂರು ಹೋಬಳಿಯ ಪಾಠಶಾಲೆಗಳಿಂದ ಅನಿಷ್ಟ ವರ್ತಮಾನಗಳು ಬರಲಾರಂಭಿಸಿದುವು. ಹಳ್ಳಿಯಲ್ಲಿ ಪ್ಲೇಗುಮಾರಿ ಹೊಕ್ಕಿದೆ; ಒಂದೆರಡು ಸಾವುಗಳಾದುವು; ಜನರೆಲ್ಲ ಹೊಲಗಳಲ್ಲಿ ಗುಡಿಸಿಲುಗಳನ್ನು ಹಾಕಿಕೊಳ್ಳುತ್ತಿದಾರೆ;… Read more…

  • ಕನಸುಗಳಿಗೆ ದಡಗಳಿರುದಿಲ್ಲ

    ಬೆಳಗ್ಗಿನ ಸ್ನಾನ ಮುಗಿಸಿದ ವೃಂದಾ ತನ್ನ ರೂಮಿಗೆ ಬಂದು ಬಾಗಿಲುಹಾಕಿಕೊಂಡು ಕನ್ನಡಿಯಲ್ಲಿ ತನ್ನ ದೇಹ ಸಿರಿಯನ್ನೊಮ್ಮೆ ನೋಡಿಕೊಂಡಳು. ಯಾಕೋ ಅವಳ ಮೈ - ಮನ ಒಮ್ಮೆ ಪುಲಕಿತವಾಯಿತು.… Read more…

  • ಮೇಷ್ಟ್ರು ರಂಗಪ್ಪ

    ಪ್ರಕರಣ ೫ ರಂಗಣ್ಣ ರೇಂಜಿನಲ್ಲಿ ಅಧಿಕಾರ ವಹಿಸಿ ನಾಲ್ಕು ತಿಂಗಳಾದುವು. ಸುಮಾರು ನಲವತ್ತು ಐವತ್ತು ಪಾಠಶಾಲೆಗಳ ತನಿಖೆ ಮತ್ತು ಭೇಟಿಗಳಿಂದ ಪ್ರಾಥಮಿಕ ವಿದ್ಯಾಭ್ಯಾಸದ ಸ್ಥಿತಿ ತಕ್ಕ ಮಟ್ಟಿಗೆ… Read more…

  • ದೋಂಟಿ ತ್ಯಾಂಪಣ್ಣನ ಯಾತ್ರಾ ಪುರಾಣವು

    ಸುಮಾರು ಆರೂವರೆ ಅಡಿಗಿಂತಲೂ ಎತ್ತರಕ್ಕೆ ಗಳದ ಹಾಗೆ ಬೆಳೆದಿರುವ ದೋಂಟಿ ತ್ಯಾಂಪಣ್ಣನು ತನ್ನ ದಣಿ ಕಪಿಲಳ್ಳಿ ಕೃಷ್ಣ ಮದ್ಲೆಗಾರರ ಮನೆ ಜಗಲಿಯಲ್ಲಿ ಮೂಡು ಸಂಪೂರ್ಣ ಆಫಾಗಿ ಕೂತಿದ್ದನು.… Read more…

  • ಕಲ್ಪನಾ

    ಚಿತ್ರ: ಟಾಮ್ ಬಿ ಇದು ಇಪ್ಪತ್ತು ವರ್ಷಗಳ ಹಿಂದಿನ ಕಥೆ! ಮಾತನಾಡುವ ಸಿನಿಮಾ ಪ್ರಪಂಚ ಅದೇ ಆಗ ದಕ್ಷಿಣ ಭಾರತದಲ್ಲಿ ತಲೆಯೆತ್ತಿದ್ದಿತು! ಸಿನಿಮಾದಲ್ಲಿ ಪಾತ್ರವಹಿಸುವ ನಟಿನಟಿಯರನ್ನು ಅಚ್ಚರಿಯ… Read more…