ಮೋತಿಲಾಲ್ ಕೈಮುತ್ತು ಭಾರತಿಯ ಪದಕಿತ್ತು
ಸ್ವಾತಂತ್ರ್ಯದೊಡವೆಯಂ ಮಾಡಿ ತೇಜಮನಿತ್ತು
ಪೋದನಾ ಸಾಹಸಿಗ ಸಗ್ಗಮಂ ಸಾರಿದನ್
ಸಾಧಿಸಿದ ರಾಜ್ಯಮನ್ ಕೆರ್ಚಾಳು ಕೊನೆಗರ್ದ
ಸತ್ಯಾಸಿಧಾರೆಯಿಂ ಧರ್ಮಕವಚವನುಟ್ಟು
ಭಾರತಿಯ ಬಿಡುಗಡೆಗೆ ವೀರಪಣಮಂ ತೊಟ್ಟು
ಧಾವಿಸಿದ ವೀರನದೊ ಸಿಂಹನಾದಂ ಗೆಯ್ದು
ಪಾವನದಹಿಂಸೆಯಿಂ ಜಯಸಿರ್ದ ಭುಜಹೊಯ್ದು.
ಭಾರತಿಯ ವಿಜಯದಲಿ ಮೆರೆಯಿಸುತ ಸಿಂಗರಿಸಿ
ಯೋಧನುಂ ತಾನಾಗಿ ಲೋಕಮನ್ನೇ ನಗಿಸಿ
ಇದಿರಿಸುವ ಶತ್ರುಗಳನೊಲುಮೆಯಿಂದಲೆ ಗೆಲಿದು
ಒದವಿರುವ ಕಷ್ಟಗಳ ಬಗೆಹಾಯ್ದು ಮುಂದರಿದು
ನಲವತ್ತು ಕೋಟಿ ಜನನಾಯಕಂ ತಾನೊದವಿ
ತೊಳಗುತಿಹನಾ ಜವಾಹರಲಾಲನಹರುರವಿ.
*****
