ಹೊಸತೆ ಇರಲಿ, ಹಳತೆ ಇರಲಿ,
ಒಳಿತು ಯಾವುದೊ, ಬಾಳ್ಗೆ ಬರಲಿ!
ಮೂಡಲೇನು, ಪಡುವಲೇನು?
ಬೆಳಕ ಬದುಕಿಗೆ ಹೂಡಿ ತರಲಿ !
ಹಳ್ಳ-ತಿಟ್ಟು ಸರಿಯಲಿ-
ಒಳ್ಳೆ ದಾರಿ ಸಮೆಯಲಿ! ೧
ಸೃಷ್ಟಿ ದೇವಿ ಕೊಟ್ಟ ಪಯಿರ
ಒಟ್ಟು ಗೂಡುತಲೆಲ್ಲರೊಕ್ಕಲಿ!
ಕೊಟ್ಟುಕೊಂಡು ಎಲ್ಲರುಂಡು
ಹೊಟ್ಟೆಯುರಿಯನು ತಿಕ್ಕಿ ಮುಕ್ಕಲಿ!
ದುಡಿದು ಒಡಲು ಸೊಕ್ಕಲಿ-
ಅಲಸಿಕೆಯದು ಬಿಕ್ಕಲಿ! ೨
ಇದ್ದ ಜನರ ಕೊಡುವ ಕೈಯಿ
ಇಲ್ಲದವರನು ಬಳಿಗೆ ಕರೆಯಲಿ!
ಬಿದ್ದ ಜನರು ಮೇಲಕೆದ್ದು
ಮುಂದೆ ಇದ್ದವರನ್ನು ಬೆರೆಯಲಿ!
ಶ್ರದ್ಧೆ ಸ್ನೇಹ ಮರೆಯಲಿ-
ಇಗ್ಗು ನೆಲವ ಹೊರೆಯಲಿ! ೩
ದನಿಯನೆತ್ತಿ ಕೊಳಲು ವೀಣೆ
ಇನಿದು ಗಾನವ ಬಿಡದ ಮಾಡಲಿ!
ಜನರು ಜಗಳ-ವಾದವುಳಿದು
ಸರಸ ಕವನವ ಸತತ ಹಾಡಲಿ !
ಧರೆಯೆ ಸ್ವರ್ಗವಾಗಲಿ-
ನರರೆ ಅಮರರಾಗಲಿ! ೪
*****
