೧
ಕಾಲನ ಕಲ್ಲಿನ ಚಕ್ರಗಳು!
ತೊಡೆಗಳ ಎಲುವಿನ ಅಚ್ಚುಗಳು!
ಪೊಳ್ಳಿನ ಹೃದಯದ ಹಂದರವು!
ಗಂಡಿನ ಹೆಣ್ಣಿನ ಹುಡುಗರ ಕಳಸ!
೨
ಕಟ್ಟೋ ಮಂಗಲ ಸೂತ್ರಗಳ!
ರುಂಡ ದಿಂಡಗಳ ಮಾಲೆಗಳ!
ಬೆಳಗೋ ಕಂಗಳ ಕತ್ತಲೆದೀಪ!
ಹಾಕೋ ನಿಡಿದುಸಿರಿನಧೂಪ!
೩
ಬಿಗಿಯೋ ಕೂದಲ ಹಗ್ಗವನು!
ಹೊಡೆಯೊ ಹುರುಪಿಲಿ ಕೇಕಿಯನು!
ಊದೋ ಕಹಳೆ ತುತ್ತೂರಿಯನು!
ದೂಡೋ ಹಿಂದಕೆ ವಿಧವೆಯನು!
೪
ಉರುಳಿತು ಅದದೋ, ಅಪ್ಪನ ತೇರು!
ಕಾಣುವವಯ್ಯೋ, ಕಣ್ಣಲಿ ನೀರು!
ಸಾಗಿತು, ಸಾಗಿತು ಸಿದಿಗೆಯ ತೇರು!
ಕಾಲನ ಕಣ್ಣಲಿ ಮಣ್ಣನು ತೂರು!
*****