ತುಂಬಿ ಬಂದಿದೆ ಹೃದಯವಿಂದು ನಿನ್ನ ನೆನಪೇ ತಂದಿದೆ |
ಅಲೆಗಳಿಲ್ಲದೆ ಪ್ರೇಮಗಂಗೆ ಶಾಂತವಾಗಿ ಹರಿದಿದೆ || ಪ ||
ಹುಣ್ಣಿಮೆಯ ಈ ಶುಭ ರಾತ್ರಿ ಹಗಲಿನಂತೆ ಬೆಳಗಿದೆ |
ಧರೆಗೆ ಇಳಿದಾ ಚಂದ್ರ ಕಾಂತಿ ಹಾಲಿನಂತೆ ಹರಡಿದೆ || ೨ ||
ಜೋಡಿ ಹಂಸದ ಪುಟ್ಟ ದೋಣಿ ತೇಲಿ ತೇಲಿ ಸಾಗಿದೆ |
ನವ ವಸಂತದ ಬಾಳ ನೌಕೆ ಒಲುವೆ ಇಂದಲೆ ಚಲಿಸಿದೆ || ೩ ||
ಗಿರಿಗಾಡಿನ ವನಸಿರಿ ಹಚ್ಚಹಸುರನೆ ಹಾಸಿದೆ |
ತಂಪನೆರೆಯುತ ತಂಗಾಳಿ ಶ್ವೇತ ಹಿಮವನೆ ಹೊದಿಸಿದೆ || ೪ ||
ನೋವನೆಲ್ಲವ ಮರೆಸಿ ಒಲವು ಹೂಮಳೆಯನು ಸುರಿಸಿದೆ |
ನಿನ್ನ ಪ್ರೇಮದ ಅಮೃತ ಧಾರೆ ಇಳೆಗೆ ಸಗ್ಗವ ಇಳಿಸಿದೆ || ೫ ||
ತುಂಬಿ ಬಂದಿದೆ ಹೃದಯವಿಂದು ನಿನ್ನ ನೆನಪೇ ತಂದಿದೆ |
ಅಲೆಗಳಿಲ್ಲದೆ ಪ್ರೇಮಗಂಗೆ ಶಾಂತವಾಗಿ ಹರಿದಿದೆ || ಪ ||
*****
೧೦-೦೧-೧೯೯೪
