ನಂದಿ ಬೆಟ್ಟವ ಕಂಡೆ

ಹೆಂಗ ಹೇಳಲಿ ನಾನು ಹೇಳಲಾರದ ಹಿಗ್ಗು
ಯೋಗ ನಂದೀಶ್ವರನ ಶಿಖರ ಕಂಡೆ
ಭೋಗನಂದಿಯು ಕೆಳಗ ಯೋಗನಂದಿಯು ಮ್ಯಾಗ
ನಂದಿ ಬೆಟ್ಟದ ಖುಶಿಯ ಬೆಳಕು ಕಂಡೆ

ಬೆಟ್ಟ ಬೆಟ್ಟದ ಮ್ಯಾಲೆ ಗಟ್ಟ ಗಟ್ಟದ ಮಾಲೆ
ನೋಡಿಲ್ಲಿ ನಿಂದಾನು ನಂದಿದೇವಾ
ಇವನೆ ಪ್ರೀತಿಯ ದೇವಾ ವಿಶ್ವಶಕ್ತಿಯ ಕಾವಾ
ಜಗದಾದಿ ಯುಗದಾದಿ ಆದಿದೇವಾ

ಮುತ್ತು ಮಾಣಿಕ ರಾಣಿ ಮುಕ್ತಾಂಬೆ ಪಾರ್ವತಿಯು
ನೋಡಿಲ್ಲಿ ಮಕ್ಕಳನ್ನು ಕೂಗುತಾಳು
ಮುದ್ದು ಮಕ್ಕಳೆ ಬನ್ನಿ ಚಿನ್ನ ಚಲುವರೆ ಬನ್ನಿ
ಮುತ್ತು ರತ್ನವ ತಾಯಿ ತೂರುತಾಳು

ನಂದಿ ಬೆಟ್ಟವ ಕಂಡೆ ನಂದಿ ದೇವನ ಕಂಡೆ
ನಂದಿ ದೇವನ ತಾಯಿ ದೇವಿ ಕಂಡೆ
ಆತ್ಮ ಶಿಖರವ ಕಂಡೆ ಸತ್ಯ ಶಿಖರವ ಕಂಡೆ
ಶಿವಶಿವಾ ಶಿವಜ್ಞಾನ ಮುಕುರ ಕಂಡೆ
*****