ಆಡು ಕನ್ನಡ ಹಾಡು ಕನ್ನಡ
ಮಾತಾಡು ಕನ್ನಡವೇ
ಪಂಪನ ಪೆಂಪಿನ ಗೊಟ್ಟಿಯಲಂಪಿನ
ಮೃದು ಪದಬಂಧದ ಚಂದದ ಕನ್ನಡ
ಆದಿ ಕಾವ್ಯದಲೆ ಅನಾದಿ ಕಂಡ ಕನ್ನಡ
ಮಹಾ ಕನ್ನಡ
ರನ್ನನ ಜನ್ನನ ಪೊನ್ನನ ಹೊನ್ನಿನ
ರಾಘವ ಲಕ್ಷ್ಮೀಶ ಕುಮಾರವ್ಯಾಸರ
ಗಟ್ಟಿ ಕನ್ನಡ ಬಟ್ಟ ಕನ್ನಡ
ಅಚ್ಚಕನ್ನಡ ಮಿಶ್ರಕನ್ನಡ
ಆಳ ಕನ್ನಡ ವಿಶಾಲ ಕನ್ನಡ
ಆಲದಂತೆ ಊರ್ಧ್ವಮುಖಿ
ಅಧಃ ಶಾಖ
ಆಡು ಕನ್ನಡ
ಕಿಸುವೊಲ ಪೊಳಲ ಕನ್ನಡ
ಪುಲಿಗೆರೆಯ ತಿರುಳ ಕನ್ನಡ
ಬನವಾಸಿಯ ಕರುಳ ಕನ್ನಡ
ಕವಿಶೈಲದ ಡಿಂಡಿಮ ಕನ್ನಡ
ಸಾಧನ ಕೇರಿಯ ಭೇರಿ ಕನ್ನಡ
ಅಕ್ಕನ ಅಣ್ಣ ಕನ್ನಡ
ಕೂಡಲಸಂಗಮ ದೇವ ಕನ್ನಡ
ಶ್ರೀಗಂಧದ ಕಂಪು ಕನ್ನಡ
ಸಹ್ಯಾದ್ರಿಯ ತಂಪು ಕನ್ನಡ
ಹಂಪಿಯ ನೋಂಪಿಯ ಸಮಸ್ತ ಕನ್ನಡ
ಚಂಪು ಕನ್ನಡ ಷಟ್ಪದಿ ಕನ್ನಡ
ವಚನ ಕನ್ನಡ ಛಂದ ಕನ್ನಡ
ಬಂಧಮುಕ್ತ ಹೊಸ ಅಂದ ಕನ್ನಡ
ದೇಸಿ ಕನ್ನಡ ಮಾರ್ಗ ಕನ್ನಡ
ಆ ಕನ್ನಡ ಈ ಕನ್ನಡ ಓ ಕನ್ನಡ
ಆರಂಕುಶಮಿಟ್ಟೊಡಂ ನೆನೆವುದೆನ್ನ ಮನಂ ಕನ್ನಡ
ಅರಿತ ಕನ್ನಡ ಮರೆತ ಕನ್ನಡ ನಿರತ ಕನ್ನಡ ಎಲ್ಲ ಕನ್ನಡ
ಆಡು ಕನ್ನಡ ಹಾಡು ಕನ್ನಡ
ಮಾತಾಡು ಕನ್ನಡವೇ
ಸುಖ ಕನ್ನಡ ಶುಭ ಕನ್ನಡ ಕ್ರಾಂತಿ ಕನ್ನಡ ಶಾಂತಿ ಕನ್ನಡ
ಆಡು ಕನ್ನಡ ಹಾಡು ಕನ್ನಡ
ಮಾತಾಡು ಕನ್ನಡವೇ
ಅಮಿತ ಕನ್ನಡ ಅಮೃತ ಕನ್ನಡ ಅನವರತ ಕನ್ನಡ
ಆಡು ಕನ್ನಡ ಹಾಡು ಕನ್ನಡ
ಮಾತಾಡು ಕನ್ನಡವೇ
ಮಾತಾಡು ಕನ್ನಡವೇ.
*****
