ಧರೆ ಬಿರಿದು ಉರಿಯುತಿದೆ
ಮೆರೆಯುತಿವೆ ಘಾತಕ ಶಕ್ತಿಗಳು
ಪರಿಹಾರ ತೋಚದ ಶ್ರೀ ಸಾಮಾನ್ಯನ
ತೊಳಲು ಕೊಚ್ಚಿ ಹೋಗುತಿದೆ
ನಾ ಮುಂದೆ ನೀ ಮುಂದೆನ್ನುತಾ…
ರಾರಾಜಿಸುತಿಹರು ಸಮಾಜ ಪೀಡೆಗಳು
ನ್ಯಾಯ… ನೀತಿ ಗಾಳಿಗೆ ತೂರಿ
ಅಟ್ಟಹಾಸದಿ ನಗುತ ಮೆರೆಯುತಿಹರು
ಯೋಜನೆ, ಯೋಚನೆಯ, ನೆಪದಲಿ
ಹಣದ ಪೋಲು ಮಾಡುತಿಹರು
ಉದ್ಧಾರ ಅಭಿವೃದ್ಧಿಯೆನ್ನುತಲಿವರು
ದಾರಿದ್ರ್‍ಯದಾಳದಲಿ ತಳ್ಳುತಿಹರು
ನಮ್ಮನು ಬಲಿಪಶುವಾಗಿಸಿ
ಏರುತಿಹರು ಸ್ವಾರ್ಥ ಚುಕ್ಕಾಣಿಕೆಯ
ಇಳಿಸಬೇಕು ನಾವುಗಳು ಒಂದಾಗಿ…
ಕಲಿಸಬೇಕು ನೀತಿ ಪಾಠವನು
ನಡೆಸಬೇಕು ಮನುಷ್ಯ ಪಥದ ದಾರಿಯಲಿ
ಶ್ರೀ ಸಾಮಾನ್ಯನು ಕೊರಗುತ ಮುದುಡದೆ
ಏಳಬೇಕು ಎಚ್ಚರವಾಗಬೇಕು
ಶಿಕ್ಷಣ-ಸಂಘಟನೆ ಅಪ್ಪಿಕೊಳ್ಳುತ…
ಸಾಗಬೇಕು ಹೋರಾಟದ ಹಾದಿ ಹುಡುಕುತ
ಸಮಾನತೆ ಕಹಳೆ ಮೊಳಗಿಸುತ….
***
