ನಿನ್ನ ದಯೆಯಿಂದಲೇ

ನಿನ್ನ ದಯೆಯಿಂದಲೇ
ನಾ ನಿನ್ನೀ ಜಗದಲಿ ಕಣ್ಣ ತೆರೆದಿರುವೆ|
ನಿನ್ನ ಕೃಪೆಯಿಂದಲೇ
ನಾನಿಲ್ಲಿ ನರನಾಗಿ ಜನ್ಮ ತಳೆದಿರುವೆ|
ಏನು ಪುಣ್ಯವೊಕಾಣೆ
ಎನ್ನ ತಾಯಿತಂದೆಯ ಮೇಲಾಣೆ
ನಾ ಧನ್ಯನಾಗಿರುವೆ|
ನಿನಗೆ ಸದಾ‌ಋಣಿಯಾಗಿರುವೆ||

ನನ್ನೆಲ್ಲಾ ಇಷ್ಟಾರ್ಥಗಳ
ನನಗರಿವಿಲ್ಲದೆ ನೀ ಪೂರೈಸುತಾಬಂದಿರುವೆ|
ನನಗಸಿವಾದಾಗಲೆಲ್ಲಾ ಸಮಯ ಸಮಯಕೆ
ಅನ್ನಾದಿಗಳನಿತ್ತು ನೀ ಸಂತೊಷ ಪಡಿಸಿರುವೆ||

ನನ್ನನಿಷ್ಟುದಿವಸ ನೀ ಕೈ ಹಿಡಿದು ಸಲಹಿ
ಇಲ್ಲಿಯವರೆಗು ತಂದಿರುವೆ|
ನೀ ಎಲ್ಲಿವರೆಗು ಕರೆದೊಯ್ಯುವೆಯೊ
ಅಲ್ಲಿವರೆಗು ನಾಬರಲು ಸಿದ್ಧನಿರುವೆ||

ನನ್ನ ಕರ್ಮಕ್ಕನುಸಾರವಾಗಿ
ನನ್ನ ಕರ್ತವ್ಯವನು ನೀ ನಿಗದಿಪಡಿಸಿರುವೆ|
ನಿನ್ನಯ ನಿಯಮದಡಿ ನಾ
ನಿಜಕೂ ಸುಖವಾಗಿರುವೆ
ಬೇಕು ಇನ್ನೇನು ಸಾಕು ಈ ನರಜನ್ಮಕೆ||
*****