ದೇವ ಕರುಣಿಸು
ನನಗೊಂದು ಕುಡಿಯ|
ಜನ್ಮನೀಡಿ ಈ ಜನ್ಮವ
ಪಾವನವಾಗಿಸುವೆನು|
ಅಮ್ಮನೆಂದೆನಿಸಿಕೊಂಡೊಮ್ಮೆ
ಆ ಮಮತೆಯನು ಸವಿಯುವೆನು||
ಆ ಹಸುಗೂಸು ಮಡಿಲಲಿ ಮಲಗಿ
ಪುಟ್ಟ ಕಾಲಲಿಂದ ಒದೆಯುವುದ
ನಾ ಕಲ್ಪಿಸಿ, ಅದರ ಬರುವಿಕೆಗಾಗಿ
ಕಾದಿರುವೆ ಕಾತರಿಸಿ |
ದಯೆ ಇರಿಸಿ ದಯಪಾಲಿಸು
ಕಂದಮ್ಮನ ಕರೆಯ ಕೇಳಿಸು||
ಅದು ಹಸಿದು ಅಳುತ ಎದೆಗೊರಗಿ
ಅಮೃತವನು ಸವಿಯುವಾಗ|
ಅದರ ಹಣೆಯ ಬೆವರ ಒರೆಸಿ
ತಾಯ್ತನವ ಅನುಭವಿಸುವ
ಆಸೆ ಫಲಿಸು, ಕಂದನಾ
ಸೇವೆಯ ಭಾಗ್ಯದೊಳಿರಿಸು||
ಎಷ್ಟೆಲ್ಲಾ ವಿದ್ಯೆಗಳಿಸಿದ್ದರೂ
ಎನೆಲ್ಲಾ ಸಂಪತ್ತೀದ್ದರೂ|
ಆ ಮಗುವೆಂಬ ಜೀವಜಲವು
ನನ್ನಲ್ಲಿರದೆ ಬರಡಾಗಿದೆ ಜಗವು|
ನನ್ನ ಕೋರಿಕೆಯ ಅರ್ಪಿಸಿ ನಿನಗೆ
ಕಾಯುತ್ತಿರುವೆನು ನಿನ್ನೊಪ್ಪಿಗೆಯ
ತುಂಬು ನೀ ಎನ್ನ ಜೋಳಿಗೆಯ||
*****
