ಸಮರ

ಸಿಂಬೆ ಸುತ್ತಿದ ಸಾವು ಹೆಡೆಯೆತ್ತಿ ಕಾಡುತಿದೆ
ಸುತ್ತ ಕುಣಿಯುತ್ತಿರುವ ಕನಸುಗಳ ಕೆಣಕಿ
ರಂಗುರಂಗಿನ ಬಟ್ಟೆ, ಮನದಲ್ಲಿ ಮಿಂಚು
ಗರಿಬಿಚ್ಚಿದಾಸೆಗಳ ನವಿಲ ಕಣ್ಣು.

ಮಣ್ಣ ಕಣಕಣದಲ್ಲು ಕನಸುಗಳು ಮೈನೆರೆದು
ಮೌನದಲಿ ಹರಿಯುತಿದೆ ಮುರಳಿ ನಾದ
ಹೊನಲಾಗಿ ಹೊಮ್ಮುವ ಅಲೆಯಲೆಯ ಕಚ್ಚಿ
ಹಾದರದ ಹಲ್ಲೆಗೆ ಸಮರ ಸನ್ನಾಹ

ವಾಸ್ತವದ ಉಸಿರಲ್ಲಿ ಊದಿಕೊಂಡಂಥ ಕನಸು-
ಬಿಟ್ಟಂಥ ಬೇರುಗಳ ನೆಲೆಯ ಹುಡುಕಿ
ವಿಷಗೊಡಲಿಯೇಟಿನಲಿ ತುಂಡುತುಂಡಾಗಿಸುವ
ಕಲ್ಲು ಬದುಕಿನ ಬೀದಿ ಕೊನೆಯದೆಲ್ಲಿ?

ಕೊಲೆಯಾಗಿ ಬಿದ್ದಿರುವ ಕನಸಿನಾ ಚೂರುಗಳು
ಸಾವೊಪ್ಪದೆ ಸೆಣಸುತಿವೆ, ಜೀವವೆಲ್ಲಿ?
ಕಣ್ಣ ಬೆಳಕಿಗೆ ಇಲ್ಲಿ ಕತ್ತಲೆಯ ಕಿಡಿ ಹತ್ತಿ
ಬೂದಿಯಾಗಿದೆ ನೋಟ, ಭಾವವೆಲ್ಲಿ?
*****