ಜನಶಕ್ತಿ

ಸ್ವಾತಂತ್ರ್ಯದ ಸಮರದಲ್ಲಿ ಸಾಮಾನ್ಯರು ಸತ್ತರು
ಬೆವರ ಬಸಿದು ಸಾವಿನಲ್ಲು ಕನಸುಗಳ ಹೆತ್ತರು ||

ಓದುಬರಹವು ಇಲ್ಲ ಕೂಲಿನಾಲಿಯೆ ಎಲ್ಲ
ಹೊಟ್ಟೆಕಟ್ಟುವ ಜನರು ಸಾಮಾನ್ಯರು
ಕತ್ತಲಿನ ಬಾಳಲ್ಲಿ ಸೂರ್ಯನ ಸುಳಿವಿಲ್ಲ
ದೇಶಕಟ್ಟುವ ಶಕ್ತಿ ಸಾಮಾನ್ಯರು ||

ಗುಡಿಸಲಿನ ಗರಿಯಲ್ಲಿ ಗೂಡುಕಟ್ಟಿದ ಸಿಟ್ಟು
ದಣಿಗಳಿಗೆ ಎದುರಾಗಿ ಸೆಟೆದು ಕುಂತು
ಜಾತಿ ಮತ ಧರ್ಮಗಳು ಹಿಂದೆ ಸರಿಯಲಿ ಹೆದರಿ
ಮಾನವತೆ ಮೊಳಗಲಿ ಬಿಡುಗಡೆಗೆ ನಿಂತು ||

ಬಾಳು ಬಿತ್ತಿದ ಬೀಜ ಬೆಳಕಿನ ತೆನೆಯೊಡೆದು
ಕೂಡಿಕೊಳ್ಳಲಿ ನಾಡ ಮಿಡಿತವನ್ನು
ಬಡವರ ಒಡಲಿನ ಸುಡುಬೆಂಕಿ ಕರಕರಗಿ
ಅಪ್ಪಿಕೊಳ್ಳಲಿ ಬೇಗ ಸಮತೆಯನ್ನು ||
*****