ತುಂತುರುಗಳು

ಪೋಪೋಪೆಡೆ ಹಿಟ್ಲರ ಪಡೆ
ಹಾಕಿದರೂ ಮಟ್ಟ
ಧೃತಿಗೆಡದಲೆ ಹೊಗೆಯುಗುಳುವ
ಚರ್ಚಿಲ್ಲನ ಚುಟ್ಟ;
ಜಡಿದರು ಮಳೆ, ಪೊತ್ತರು ಇಳೆ
ಉರಿಬಿಸಿಲಿನ ಕಾಟ
ವಿರಮಿಸುತಲಿ ಮಲಗುವ ಸೋ-
ಮಾರಿಯ ಸಿಗರೇಟ;
ಜ್ಞಾಪಿಸುವೊಲು ನಿಂತಿವೆ ಭ-
ದ್ರಾವತಿಯೊಳು, ರಮಣಿ
ಗಗನವನೇ ತಿನಿಯುವವೊಲು
ಹೊಗೆಯುಗುಳುವ ಚಿಮಣಿ!
* * *

“ಯಾವ ಅಟಾಮಿಕ್ಯು ಬಾಂಬು
ನನ್ನ ಮಂದೆ ನಿಲ್ವುದು?
ಯಾವ ಡೈನಮೈಟು ತಾನೆ
ನನ್ನ ಧುರದಿ ಗೆಲ್ವುದು?
ಯಾವುದಕ್ಕೊ ಈ ಜಗದಿ
ನನ್ನ ಮಾನ ಸಲ್ವುದು?”
ಎಂದು ವೃಥಾ ಕೂಗಿ ಕರಟ
ಆರ್ಭಟಿಸುತಲುರಿವುದು!
* * *

ಬಿಸಿನೀರ ಕಾವಿನಿಂ
ದವಳ ಮೊಗ ಕೆಂಪೇರಿ
ದುದ ಕಂಡು ನನ್ನ ಮನ ಕುದಿಯಿತಲ್ಲ!
ಬಿಸಿನೀರೆ! ನೀ ಧನ್ಯ!
ಅವಳ ಮೊಗವನು ನೀನು
ಮುತ್ತಿಟ್ಟು ಕೆಂಪೇರಿಸಿರುವೆಯಲ್ಲ!
* * *

“ಹಗಲು ಇರುಳು ನಾನು ಕಾದ
ಸವಿಯ ಹಣ್ಣ ತಿರುಳನು
ಸವಿದು ತಿಂಬರಲಾ ಜನರು
ಬಗೆಯುತೆನ್ನ ಕರುಳನು
ಹಾಳು ಜನರು ಕಾಲನಿಡಲಿ
ಕೈಯಕೊಡುವೆ” ನೆನ್ನುತ
ಬಾಳೆ ಹಣ್ಣ ಸಿಪ್ಪೆಯಿಹುದು
ರಸ್ತೆಯೊಳೇ ಕಾಯುತ!
* * *

“ಧೂಳು ಹಾರದಿರಲೆನುತ್ತ
ಟಾರ ರೋಡು ಹಾಕಿದ!
ಅಹುದು, ಒಪ್ಪಿಕೊಂಬೆ, ನನ್ನ
ನೇನೊ ಸೋಲ್ಗೆ ನೂಕಿದ!
ಆದರೇನು ಮಾಡಬಲ್ಲ?
ನಾನುಗುಳ್ವೆ ಕರಿಹೊಗೆ!”
ಎನುತದೊಂದು ಮುರುಕು ಕಾರು
ಸಾರುತಿತ್ತು ಊರಿಗೇ!
* * *

ಭೂತವಾದರು ಸರಿಯೆ ಮನುಜಗೆ
ಹೆದರಿ ನಿಲ್ಲದು ಅರೆಚಣ,
ಎಷ್ಟು ಧೈರ್ಯವೊ ಮೂಗ ಮೇಲೆಯೆ
ಬಂದು ಕೂರ್ವುದು ಈ ನೊಣ!

* * *
ಕರಿಯ ಹುಡುಗಿಯು ನಗಲು ಕಾಣುವ
ಬಿಳಿಯ ಹಲ್ಲಿನ ಮಿಂಚೊಲು
ಬೆಂಗಳೂರಿನ ಟಾರ ರೋಡೊಳು.
ಬೆಣಚು ಕಲ್ಲಿನ ಗೊಂಚಲು!
* * *

ಮರಗಳೆಲೆಯ ನಡುವೆ ಕಾಂಬ
ತುಂಬುವೆರೆಯ ಚೆಲುವಿಗೆ
ಸಾಟಿಯೇನು ಬರಿಯ ಕಣ್ಗೆ
ತೋರ್ವ ಚಂದ್ರಮಂಡಲ?-
ಒಡಲು ಕಂಡು ಕಾಣದಂಥ
ಅರ್ಧ ನಗ್ನ ಸುಂದರಿ
ಮನ ಸೆಳೆವೊಲು ಸೆಳೆವಳೇನು
ಪೂರ್ಣನಗ್ನ ರಮಣಿಯು!
*****