೧
ನಿಸರ್ಗವನದಲಿ, ಕಂಗೊಳಿವ ಕಾನನದಿ
ಕುಳಿತು ಕೂಗುವ ನೀ! ಪುಟ್ಟಹಕ್ಕಿ!
ಪ್ರೇಮಮಯ ಪತಿತಪಾವನವ ನೀ! ಹಾಡು
ಓ! ಪುಟ್ಟ ಹಕ್ಕಿ!
ಓ! ನಿನ್ನ ಉತ್ತೇಜ ಉತ್ಸಾಹವನು ಹಾಡಿ!
ಓ! ನಿನ್ನ ಗಾನಚಿಲುಮೆಯನು ತೋಡಿ!
ಪತಿತಪಾವನವ ನೀ! ಹಾಡು
ಓ! ಪುಟ್ಟ ಹಕ್ಕಿ!
೨
ಸುಂದರ ವನದಲಿ, ಕಣಿವೆಕಂದರ ಛಾಯೆಯಲಿ
ಮಧುರಮರಗಿಣಿ ನೀ! ಪುಟ್ಟ ಹಕ್ಕಿ!
ವನದಲಿಹರಿವ ತಣಿವತೊರೆಯ ನೀ! ಹಾಡು
ಓ! ಪುಟ್ಟ ಹಕ್ಕಿ!
ಓ! ನಿನ್ನ ಮಧುರ ಸವಿಗಾನವನು ಬೆರಸಿ!
ಓ! ನಿನ್ನ ಒಲುಮೆಯನು ಅದರಲಿರಿಸಿ!
ತಣಿವತೊರೆಯ ನೀ! ಹಾಡು
ಓ! ಪುಟ್ಟ ಹಕ್ಕಿ!
೩
ವನದವೇದಿಯಲಿ, ವೈಭವವಿಶಾಲದಲಿ
ನೆಲೆಸಿನಲಿಯುವ ನೀ! ಪುಟ್ಟ ಹಕ್ಕಿ!
ಸವಿಸಲ್ಲಾಪ ಸಂಪಿಗೆಯ ನೀ! ಹಾಡು
ಓ! ಪುಟ್ಟ ಹಕ್ಕಿ!
ಓ! ನಿನ್ನ ರಾಗದೂಟೆಯನು ಪಠಿಸಿ!
ಓ! ನಿನ್ನ ವಿಶಾಲವೈಭವವ ವಲಿಸಿ!
ಸಲ್ಲಾಪಸಂಪಿಗೆಯ ನೀ! ಹಾಡು
ಓ! ಪಟ್ಟ ಹಕ್ಕಿ!
೪
ಎಳೆಹಸುರಿನಲಿ, ಮೃದುಮಮತೆಯಲಿ
ಸೇರಿಸಾಗುವ ನೀ! ಪುಟ್ಟ ಹಕ್ಕಿ!
ನಲುವುನಾಟ್ಯದ ಹರಿಣನನು ನೀ! ಹಾಡು
ಓ! ಪುಟ್ಟ ಹಕ್ಕಿ!
ಓ! ನಿನ್ನ ದೀರ್ಘಧಾಟಿಯನು ಎಳೆದು!
ಓ! ನಿನ್ನ ಮಾಗಧನಹಿಮೆಯನು ಸೆಳೆದು!
ನಾಟ್ಯದ ಹರಿಣನನು ನೀ! ಹಾಡು
ಓ! ಪಟ್ಟ ಹಕ್ಕಿ!
೫
ಸ್ಥಾಯಿನಿಲುವಿಕೆಯಲ್ಲಿ, ಕೌಶಲ್ಯ ಜಾಜ್ವಲ್ಯದಲಿ
ಉಲಿಉಲಿವ ನೀ! ಪುಟ್ಟ ಹಕ್ಕಿ!
ನೇಮನಿಸರ್ಗದ ಮಹಿಮೆ ನೀ! ಹಾಡು
ಓ! ಪುಟ್ಟ ಹಕ್ಕಿ!
ಓ! ನಿನ್ನ ಕೋಮಲಕಂಠದಿಂ ಕೋರಿ!
ಓ! ನಿನ್ನ ಮೃದುಮಮತೆಯನು ತೋರಿ!
ನಿಸರ್ಗದಮಹಿಮೆ ನೀ! ಹಾಡು
ಓ! ಪುಟ್ಟ ಹಕ್ಕಿ!
*****
