ಎಂತೂ ನಾನಿರಬೇಕಿದ್ದರೆ
ಅಂತಿರಬೇಕೊ ಇಂತಿರಬೇಕೊ
ನಾ ಎಂತಿರಬೇಕೊ
ಕೂತಲಿಂದ ಏಳಲೆ ಬೇಕೊ
ಎದ್ದಮೇಲೆ ಓಡಲೆ ಬೇಕೊ
ಎಡೆತಡೆಗಳ ಮೀರಲೆ ಬೇಕೊ
ಸದಾ ನಡೆಯುತ್ತಿರಬೇಕೊ
ಇನ್ನೊಬ್ಬರು ಕಲಿಸಿದ ಮಾತನು
ಒಪ್ಪಿಸಬೇಕೊ
ಇತರರ ಮಾತಿಗೆ ತಲೆ
ಜಪ್ಪಿಸಬೇಕೊ
ನಗು ಬರದಿದ್ದರು ನಗುತಿರಬೇಕೊ
ಬರುತಿದ್ದರೆ ಹೇಗೋ ತಡಕೊಳ್ಳಬೇಕೊ
ಅಳುವಂತಿದ್ದರೆ ಅಳದಿರಬೇಕೊ
ಮುಖವಾಡ ಗಟ್ಟಿ ಬಿಗಿದಿರಬೇಕೊ
ಕರೆದರೆ ಓಗೊಡಬೇಕೊ
ಸರಿ ಸರಿ ಎಂದು ತಲೆದೂಗಬೇಕೊ
ನಿದ್ದೆ ತೂಗುತಿದ್ದರು ಎಚ್ಚರಬೇಕೊ
ಅದಕೇ ಸ್ವಂತ ಮೈ ಚಿವುಟಬೇಕೊ
ಅಥವಾ ಕ್ರಾಂತಿಕಾರಿಯಾಗಿರಬೇಕೊ
ಬಾಯಲಿ ಹೊಗೆ ಉಗುಳುತಿರಬೇಕೊ
ಜೇಬಲಿ ಸಿಡಿಮದ್ದು ಇಟುಕೊಂಡಿರಬೇಕೊ
ಒಂದಷ್ಟು ಮಂದಿಯ ಕೊಂದಿರಬೇಕೊ
ಚರಿತ್ರೆಯ ಬದಲಾಯಿಸುತೇನೆ
ಎಂದಿರಬೇಕೊ
ಹುತಾತ್ಮತೆಯ ವ್ಯಸನ
ಹಚ್ಚಿರಬೇಕೊ
ತೀವ್ರವಾದದ
ರೊಚ್ಚಿರಬೇಕೊ
ಸುಡುತೇನೆನ್ನುವ
ಕಿಚ್ಚಿರಬೇಕೊ
ಅಂತಿರಬೇಕೊ ಇಂತಿರಬೇಕೊ
ಇರದಾಗುವನಕ ನಾನೆಂತಿರಬೇಕೊ
*****
