ಸ್ವರವೊಂದಾಗಿ

ಸ್ವರವೊಂದಾಗಿ ಇರುವುದೆ ಇಲ್ಲ
ತೆರೆಯೊಂದಾಗಿ ಬರುವುದೆ ಇಲ್ಲ
ಸ್ವರಕೆ ಪ್ರತಿಸ್ವರ ಇದ್ದೇ ಇರುತದೆ
ತೆರೆಯ ಹಿಂದೆ ತೆರೆ ಬಂದೇ ಬರುತ್ತದೆ

ಇರುವೆಯೊಂದಾಗಿ ಇರುವುದೆ ಇಲ್ಲ
ಜೇನ್ನೊಣವೊಂದಾಗಿ ಹಾರುವುದಿಲ್ಲ
ಒಂದೊಂದಿರುವೆಗು ಸಾಲಿರುತದೆ
ಜೇನ್ನೊಣಕೊಂದು ಗೂಡಿರುತದೆ

ಮಳೆಗೊಂದೇ ಹನಿ ಎಂದೂ ಇಲ್ಲ
ಬೆಳಗೊಂದೇ ಸಹಿ ಸಾಧ್ಯವು ಇಲ್ಲ
ಮಳೆಯೆಂದರೆ ಅದು ಎಷ್ಟೋ ಬಿಂದು
ಬೆಳೆಯೆಂದರೆ ಸಸ್ಯ ಸಿಂಧು

ನಕ್ಷತ್ರವೊಂದಾಗಿ ಮೂಡುವುದಿಲ್ಲ
ಗ್ರಹವೊಂದಾಗಿ ತಿರುಗುವುದಿಲ್ಲ
ನಕ್ಷತ್ರಕೆ ನಕ್ಷತ್ರದ ಸಹವಾಸ
ಒಂದು ಗ್ರಹಗತಿಗಿನ್ನೊಂದರ ಧ್ಯಾಸ

ಪದವೊಂದಾಗಿ ಅರ್‍ಥವೆ ಇಲ್ಲ
ವಾಕ್ಯವೊಂದಾಗಿ ಮಾತೂ ಇಲ್ಲ
ಪದವೊಂದಕೆ ಇನ್ನೊಂದೇ ಪದ ಅರ್‍ಥ
ವಾಕ್ಯಕೆ ವಾಕ್ಯ ಮಾತಿನ ಲಾಸ್ಯ

ವಿಚಾರವೊಂದಾಗಿ ಹುಟ್ಟುವುದಿಲ್ಲ
ಅರಿವೊಂದಾಗಿ ಬೆಳೆಯುವುದಿಲ್ಲ
ವಿಚಾರವೆಂದರೆ ಲಹರಿಯ ರೂಪ
ಅರಿವೆಂದರೆ ಬೆಳಕು ಸ್ವರೂಪ
*****