ಸೂಳೆಕುದುರೆಯ ಬಿಟ್ಟು
ಮೂಜಗದಿ ಸಂಚರಿಸಿದೆವು,
ಕಟಿ ಹಾಕುವ ಕಲಿಯು
ಒಬ್ಬನಿಲ್ಲವು ಎಂಬ ಹೆಬ್ಬುಬ್ಬಿನೀ ಚಿಹ್ನ
ಗಂಡಸಿನ ಹೃದಯ `ಹೂಂಕಾರ’!
ಮುದುಕನಾಹುತಿ ಕೊಟ್ಟು
ಹುಡುಗಿಯ ತಲೆಬುರುಡಿಯನು
ಕೆಂಪು ಬಟ್ಟೆಯೊಳದ್ದಿ
ಪೂರ್ವ-ಪಶ್ಚಿಮದಿ ಮೆರೆಯಿಸಿದೆವೆಂದು
ಗಂಡಸಿನ ಹೃದಯ `ಹೂಂಕಾರ’!
ಮೂವತ್ತುಮೂರು ಕೋಟಿ
ಕುರಿಗಳನು ಕೂಳಿಲ್ಲದೆಯೆ
ಕೊಂದು, ದೇವತೆಗಳನೆಲ್ಲ
ತುಷ್ಟಪಡಿಸಿದೆವೆಂಬ ಜಯಪತಾಕೆ
ಗಂಡಸಿನ ಹೃದಯ ‘ಹೂಂಕಾರ’!
ಭಿಕ್ಷುಕರನೆಲ್ಲ ಬದಿಗಿರಿಸಿ
ಸಾಲದೆಲೆಗಳ ಹಾಸಿ
ಪಂಚಪಕ್ವಾನ್ನಗಳ ಬಡಿಸಿ
ಒಲ್ಲೆವೆನ್ನುತ ಭುಂಜಿಸಿದ ಬಲಭೀಮರೆಂದು
ಗಂಡಸಿನ ಹೃದಯ `ಹೂಂಕಾರ’!
ಈ ಗಂಡಸರ ಮಂಡಲಕೆ
ಕೊಳ್ಳಿಯ ಕೊಟ್ಟು ಸುಟ್ಟು
ಬಿಡಲಾಯೆಂದು ಯತ್ನಿಸುವೆ,
ಅದಕೆ ನಾನಲ್ಲದಿನ್ನೋರ್ವ ಕಲಿಯಿಲ್ಲೆಂದು
ಗಂಡಸಿನ ಹೃದಯ `ಹೂಂಕಾರ’!
*****
