ಇವರಾರೆಂದು ಹೇಳಮ್ಮ

ಮಗು : ಚಾಳೀಸು ಧರಿಸಿ ಕೈಯಲಿ ಕೋಲನ್ನು
ಹಿಡಿದಿಹ ಯೋಗಿ ಯಾರಮ್ಮ?
ತಾಯಿ : ಅವರು ನಮ್ಮಯ ಗಾಂಧಿ ತಾತ
ನಮ್ಮ ದೇಶದ ಪಿತಾಮಹ
ಮಗು : ಗಾಂಧಿ ಟೋಪಿ ಖಾದಿ ಜುಬ್ಬ
ವಾಜ್‌ಕೋಟಿನಲಿ ಇದೆ ಗುಲಾಬಿ?
ತಾಯಿ : ಅಯ್ಯೋ ಮರಿ ನಿನಗೆ ಗೊತ್ತಿಲ್ವೆ?
ಚಾಚಾ ನೆಹರು ಪ್ರಧಾನಿಯಲ್ವೆ?
ಮಗು : ಬೋಳು ತಲೆ ಅಜಾನುಬಾಹು
ಘನ ಗಂಭೀರ ಅಂತೆ ಸುಬಾಹು?
ತಾಯಿ : ವಲ್ಲಭಭಾಯಿ ಪಟೇಲರವರು
ಉಕ್ಕಿನ ಮನುಷ್ಯ ಎಂದು ಕರೆವರು
ಮಗು : ಕನ್ನಡಕಧಾರಿ ಸಮವಸ್ತ್ರ ಧರಿಸಿಹ
ಸೆಲ್ಯೂಟ್ ಮಾಡುವ ಶಿಸ್ತಿನ ಶಿಪಾಯಿ?
ತಾಯಿ : ನೇತಾಜಿ ಸುಭಾಸ ಚಂದ್ರರು ಅವರು
ದೇಶಕೆ ಜೀವ ಮುಡಿಪಾಗಿಟ್ಟರು
ಮಗು : ಪುಟ್ಟ ದೇಹದ ಖಾದಿ ಬಟ್ಟೆಯನ್ನು
ಧರಿಸಿಹ ಯೋಗಿ ಗೊತ್ತೇನಮ್ಮ?
ತಾಯಿ : ಜೈ ಜವಾನ್ ಜೈ ಕಿಸಾನ್‌ದ ಮಹನೀಯರು
ನಮ್ಮ ಬಡ ಪ್ರಧಾನಿ ಲಾಲ್ ಬಹಾದ್ದೂರರು
ಮಗು : ಇಂಗ್ಲೀಷ್ ಹ್ಯಾಟು ಧರಿಸಿದ ಯುವಕ
ಕುಡಿ ಮೀಸೆ ಹುರಿ ಮಾಡುತಿರುವರಾರಮ್ಮ?
ತಾಯಿ : ಬ್ರಿಟಿಷರ ಪಾರ್ಲಿಮೆಂಟಿನಲಿ ಬಾಂಬೆಸೆದ
ನೇಣಿಗೆ ಬಲಿಯಾದ ಭಗತ್‌ಸಿಂಗ್‌ರು
ಮಗು : ಕಟ್ಟುಮಸ್ತಾದ ಬರಿ ಮೈಯಲ್ಲಿರುವ
ಹುರಿ ಮೀಸೆ ಸರದಾರ ಯಾರಮ್ಮ?
ತಾಯಿ : ಕ್ರಾಂತಿಕಾರಿಗಳ ಸಹಚರನಾಗಿದ್ದ
ಬ್ರಿಟಿಷರಿಗೆ ಸಿಂಹಸ್ವಪ್ನನಾಗಿದ್ದ ರಾಜಗುರು

ದೇಶದ ಸ್ವಾತಂತ್ರ್ಯಕೆ ಅವರೆಲ್ಲರೂ
ದೇಹ ಬಲಿದಾನಗೈದಿಹ ವೀರರು
ಅವರ ಆದರ್ಶ ಬೆಳೆಸಿಕೋ ಮಗು
ಭಾವಿ ಭಾರತವನು ನೀ ಬೆಳಗು
*****