ಒಲವೇ ನನ್ನೊಲವೇ
ಕಣ್ಣಲ್ಲಿ ಕಾಡಿರುವೆ
ನೂರೊಂದು ಕನಸಾಗಿ
ಬಾಳೆಲ್ಲ ತಬ್ಬಿರುವೆ |ಪ|
ಇನ್ನು ಏಕೆ ಇಲ್ಲ ಮಾತು
ಒಲವು ಕಾಣದೆ
ಹೃದಯ ಒಡೆದು ತರಲೆ
ಹೇಳೆ ಕೋಮಲೆ || |ಅ.ಪ|
ಕನಸು ನೀನು ಕವನ ನೀನು
ಅದನೆ ಬರೆವೆ ನೀನು
ನಿನ್ನ ಹೊರತು ಯಾವ ಮಾತು
ಕಲಿತಿಲ್ಲ ನೀ ಕೇಳು ಜಾಣೆ
ಅರಿವು ನೀನು ಚೆಲುವು ನೀನು
ಇನ್ನು ಬೇಕು ಏನು
ನಿನ್ನಂತೆ ನುಡಿ ಸೊಬಗು
ಇನ್ಯಾವ ಸೊಗಸು ನಾ ಕಾಣೆ
ನಿನ್ನೊಲವು ನನ್ನ ಗೆಲುವು
ಮುಂಗಾರು ಗಿರಿನವಿಲು ಸಮ್ಮೇಳವು || ೧ ||
ತುಂಬಿ ಬಂದ ಕಡಲಿನಲ್ಲಿ
ನಿನ್ನ ಪ್ರೀತಿ ಮೊರೆತ
ಅಲೆ ನುಡಿವ ಪ್ರತಿ ಮಾತು
ನಿನ್ನಂತರಾಳದ ತುಡಿತ
ಬೀಸಿ ಬಂದ ಗಾಳಿಯಲ್ಲಿ
ನಿನ್ನ ಪ್ರೀತಿ ಉಸಿರು
ಉಸಿರೊಳಗೆ ಬೆಚ್ಚನೆಯ
ಮೈದುಂಬಿದೆ ನಿನ್ನ ಹೆಸರು
ಎಲ್ಲೆಲ್ಲು ನೀನೇನೆ
ನೀನಿರದ ಜಗವನ್ನು ನಾ ಕಾಣೆನೆ || ೨ ||
*****
