ಒಮ್ಮೆ ಪ್ರೀತಿಯಲಿ
ಸೋತರೇನು,
ಮೋಸ ಹೋದನೆಂದೇಕೆ
ಕೊರಗುವೆ ನೀನು|
ನವಚೈತನ್ಯವ ತಂದುಕೊ
ಸೋತು ಸೊರಗಿ ನೀ ಮಂಕಾಗದಿರು|
ಹೊಸ ಜೀವನವ ನೋಡು
ಹಳೆಯದನ್ನೆಲ್ಲಾ ಮರೆತುಬಿಡು||
ಏಕೆ? ಪ್ರೇಮ
ಫಲಿಸಲಿಲ್ಲವೆಂದು ಯೋಚಿಸು|
ನಿನ್ನ ಪ್ರೀತಿಸುವವರ
ನೀ ಪ್ರೀತಿಸೆ ಸ್ವಾಗತಿಸು|
ಪ್ರೇಮ ಕುರುಡು ಸತ್ಯ, ಆದರೆ
ಕುರುಡು ಪ್ರೇಮ ಸತ್ಯವಲ್ಲ||
ಪ್ರೀತಿ ಎಂದರೆ ಬರೀ
ಹದಿಹರೆಯದಲಿ ಬಂದು
ಹೋಗುವ ಹೆಣ್ಣು ಗಂಡಿನ
ಆಕರ್ಷಣೆಯೊಂದೇ ಪ್ರೀತಿಯಲ್ಲ|
ಸ್ನೇಹಿತರ ಪ್ರೀತಿಸು
ನೆರೆಹೊರೆಯವರ ಪ್ರೀತಿಸು
ಮನುಕುಲ, ಪ್ರಾಣಿಸಂಕುಲವ ಪ್ರೀತಿಸು
ಪ್ರಕೃತಿ ಮಾತೆಯ ಪ್ರೀತಿಸು||
ತಿರಸ್ಕಕರಿಸಿದನು ಬಿಟ್ಟು ಬಿಡು
ಪುರಸ್ಕರಿಸುವುದನು ನೋಡು|
ಅಕ್ಕ ತಂಗಿಯರ ಪ್ರೀತಿಸು
ಒಳ್ಳೆಯ ಪುಸ್ತಕ,
ಒಳ್ಳೆಯ ಸಂಗೀತವನು ಪ್ರೀತಿಸು|
ಒಳ್ಳೆಯದನ್ನೆಲ್ಲಾ ಪ್ರೀತಿಸು
ಒಳ್ಳೆಯದೇ ಬೆಳೆಯುವುದು
ಒಳ್ಳೆಯದೇ ಉಳಿಯುವುದು
ಉಳಿಯುವುದನೇ ನೀ ಪ್ರೀತಿಸು
ಉಳಿಯುವುದನೇ ನೀ ಗಳಿಸು||
*****
