ಮೊನ್ನೆ ಬಿದ್ದ ಮಳೆಗೆ ಮೈಯೆಲ್ಲಾ ಒದ್ದೆ
ಬಂದ ನೆನಪುಗಳ ಅಲೆಯಲಿ ಮುಳುಗಿದ್ದೆ
ಕಛೇರಿ ಬಿಟ್ಟು ಮನೆ ಸೇರುವ ಹಾದಿಯಲಿ
ಮಳೆ ಹನಿ ಸೋಕಿದಾಗ
ಬಿಚ್ಚಿದ್ದು ನೆನಪುಗಳ ಸರಮಾಲೆ
ಕಡಲ ದಂಡೆಯಲಿ ಮರಳಾಟ ಆಡಿದ್ದು
ಅಲೆಗಳಲಿ ಸಿಲುಕಿದಾಗ ನಾನು ಬಿದ್ದದ್ದು
ಅಷ್ಟರಲಿ ನೀನೋಡೋಡಿ ಬಂದದ್ದು
ನನ್ನನ್ನು ಬರಸೆಳೆದು ನಿನ್ನೆದೆಗಾನಿಸಿಕೊಂಡದ್ದು
ನನ್ನ ಮೈಯೆಲ್ಲ ಜುಂ ಜುಂ ಎಂದದ್ದು
ಮರೆತಿಲ್ಲ ನಿನ್ನುಸಿರು ಎನ್ನೆದೆ ಸವರಿದ್ದು
ಮೊನ್ನೆ ನನ್ನ ಮಾತನಾಡಿಸದೇ ಹೋದದ್ದು
ಏಕಿಷ್ಟು ಸಿಟ್ಟು ಬಿಡು ಹುಸಿ ಕೋಪ
ನಾನೇನು ತಪ್ಪು ಮಾಡಿದ್ದೆ?
ಶಿಕ್ಷಿಸಬೇಡ ಮೌನವಾಗಿದ್ದು
ಬೊಗಸೆ ತುಂಬಾ ನೀಡುವೆ ಪ್ರೀತಿ
ಮಾಡದ ತಪ್ಪಿಗೆ ಮನ್ನಿಸೆಂದು
ಹಗಲಿರುಳೆಲ್ಲಾ ದೇವರಲ್ಲಿ ಬೇಡಿದೆ ಗೊತ್ತಾ!
ಹೋದೆ ಮಾರನೇ ದಿನ ಕಛೇರಿಗೆ
ನಿನ್ನ ಪ್ರೇಮದೋಲೆ ಕಂಡು
ಬಂದಿತು ಈ ದೇಹಕೆ ಮರುಜೀವ
ಗುಲ್ಮೊಹರು ಮರದ ನೆರಳಿನಲಿ
ಹರಟೆ ಪ್ರೀತಿ ಪಿಸು ಮಾತು
ಪ್ರೇಮಿಗಳಾಟ ಆಡೋಣು ಕುಳಿತಲ್ಲಿ
ಬಾ ಎಂದು ಬರೆದದ್ದು ಸ್ವರ್‍ಗಕ್ಕೆ
ಮೂರೇ ಗೇಣು ಎಂದೆನಿಸಿತ್ತು.
ನಿನ್ನೊಂದಿಗೆ ಸಿದ್ಧಳಾದವಳು ನಾನಾಗಲೇ
ಸುದೀರ್ಘ ಜೀವನ ಪಯಣಕೆ
ಇಲ್ಲಿ ಮತ್ತೆ ಜಿನುಗುತಿದೆ
ಇದ್ದೀನಿಲ್ಲಿ ನಿನ್ನ ನೆನಪಲ್ಲೇ
ಕಾಯುತ್ತಿದ್ದೇನೆ ನಿನ್ನಾಗಮನಕ್ಕಾಗಿ
ನೆನಪುಗಳೇ ಹೀಗೆ
ಮುಂಗುರುಳಿನೊಂದಿಗೆ ಲಾಸ್ಯವಾಡಿದಂತೆ
*****
