ಬಿಟ್ಟುಕೊಡುವ ಸಮಯ

ಝಗ ಝಗಿಸುವ ಮಾರ್ಕೆಟ್ಟಿನ ಜರತಾರಿ ಜಗತ್ತು
ಬೆಳಕಿನ ಬೋಗುಣಿ ಅಂಗಡಿ, ಮುಸ್ಸಂಜೆಯ ಹೊತ್ತು.
ಅಂಗಡಿಯೆರಡೂ ಬದಿಗೂ ಪತ್ತಲಗಳ ತೂಗು
ಬಣ್ಣದ ಸರಕಿನ ಲೀಲೆ, ಬಯಕೆಯುರಿಯ ಕೂಗು.
ಯಾರಯಾರ ಜೊತೆಗೊ ಮಾತು ಎಲ್ಲೆಲ್ಲೋ ಕೂತು,
ಕುದಿ ತುಂಬಿದ ಏರುಕೂಗು ಯಾರನ್ನೋ ಕುರಿತು.
ಗುಹೆಯ ಆಳದಿಂದ ಮೇಲೆ ಚಿಮ್ಮಿ ಬರುವ ಒಳದನಿ
ಇನ್ನಾವುದೊ ದಿಕ್ಕಿನಿಂದ ಅದಕ್ಕೊಂದು ಮಾರ್ದನಿ.
ಗಡಿಬಿಡಿ ಕಾತರ ಸಡಗರ ಸಂಭ್ರಮದುದ್ಗಾರ,
ಮೇಲೆ ಏರಿ ತೂರಿ ಕವಿದು ಹೋರುವ ಹುನ್ನಾರ;
ಉಕ್ಕಿದ ಜೀವದ ಮೋದವ ಮತ್ತಾವುದೊ ಪಾತ್ರಕೆ
ಸುರಿಯಬೇಕು ಎನ್ನಿಸುವ ಕಿಚ್ಚು ಜೀವ ಜೀವಕೆ.

ಏನೋ ಖಿನ್ನತೆ ಈಗ ಇರುಳು ಇಳಿವ ಹೊತ್ತಿಗೆ
ಜೀವ ಹಸಿದು ಕೂಗುತ್ತಿದೆ ಹೊತ್ತು ತರದ ಬುತ್ತಿಗೆ.
ಆರುತ್ತಿದೆ ಒಂದೊಂದೇ ದೀಪ ಆಗಲೇನೆ
ಮುಚ್ಚಿ ಬಿಡುವುದಂಗಡಿ ಇನ್ನು ಬೇಗಲೇನೆ.
ಬಿಟ್ಟುಕೊಡುವ ಸಮಯಕ್ಕೆ ಏನೋ ಖೇದ ಉಕ್ಕಿದೆ,
ನೆನಪಿನ ಹರೆಯೇರಿ ಮಂಗ ನೆಲದತ್ತಲೆ ಜೀಕಿದೆ.
ನಡೆದು ಬಂದ ದಾರಿಯಲ್ಲಿ ಮರಳಿ ಮನದ ಆಟ,
ಹಾಯದಿದ್ದ ಓಣಿಗಳಲೂ ಕಲ್ಪನೆಗಳ ಆಟ.
ಮುಲುಕುತ್ತಿದೆ ಕಿಟಕಿ ಬದಿಗೆ ಕತ್ತರಿಸಿದ ಬಾಲ,
ಬಾಯಿಬಿಗಿದ ಚೀಲದಲ್ಲಿ ಮಿಡುಕುವ ಮಾರ್‍ಜಾಲ.
*****

Leave a Reply

 Click this button or press Ctrl+G to toggle between Kannada and English

Your email address will not be published. Required fields are marked *

Previous post ಮುತ್ತು
Next post ಹೂ ನಗೆ ಬೀರಿದಾಗ – ೨

ಸಣ್ಣ ಕತೆ

  • ಬಿರುಕು

    ಚಂಪಾ ಹಾಲು ತುಂಬಿದ ಲೋಟ ಕೈಯಲ್ಲಿ ಹಿಡಿದು ಒಳಗೆ ಬಂದಳು. ಎಂದಿನಂತೆ ಮೇಜಿನ ಮೇಲಿಟ್ಟು ಮಾತಿಲ್ಲದೆ ಹೊರಟು ಹೋಗುತ್ತಿದ್ದ ಅವಳು ಹೊರಡುವ ಸೂಚನೆಯನ್ನೇ ತೋರದಿದ್ದಾಗ ಮೂರ್‍ತಿ ಬೆಚ್ಚಿ… Read more…

  • ಅಹಮ್ ಬ್ರಹ್ಮಾಸ್ಮಿ

    ಬಹುಶಃ ಮೊದಲ ಬಾರಿ ನಾನು ಅವನನ್ನು ನೋಡುತ್ತಿರಬೇಕು. ಅವನು ಅಕಸ್ಮತ್ತಾಗಿ ನನ್ನ ಕಣ್ಣಿಗೆ ಬಿದ್ದನೋ, ಅಲ್ಲಾ ಅವನೇ ನಾನು ಕಾಣುವ ಹಾಗೆ ಎದುರಿಗೆ ಬಂದನೋ ಎಂಬ ವಿಷಯದಲ್ಲಿ… Read more…

  • ದಾರಿ ಯಾವುದಯ್ಯಾ?

    ಮೂವತೈದು ವರ್‍ಷಗಳ ನಂತರ ಅಮಲ ನಿನ್ನೂರಿಗೆ ಬರುತ್ತಿದ್ದೇನೆ ಅಂತ ಫೋನ ಮಾಡಿದಾಗ ಮೃಣಾಲಿನಿಗೆ ಆಶ್ಚರ್‍ಯ ಮತ್ತು ಆತಂಕ ಕಾಡಿದವು. ಬರೋಬ್ಬರಿ ಮೂವತ್ತೈದು ವರ್ಷಗಳ ಹಿಂದೆ ವಿಶ್ವವಿದ್ಯಾಲಯದ ಕ್ಯಾಂಪಸ್… Read more…

  • ಅಜ್ಜಿಯ ಪ್ರೇಮ

    ಎರಡನೆಯ ಹೆರಿಗೆಯಲ್ಲಿ ಅಸು ನೀಗಿದ ಮಗಳು ಕಮಲಳನ್ನು ಕಳಕೊಂಡ ತೊಂಬತ್ತು ವರ್ಷದ ಜಯಮ್ಮನಿಗೆ ಸಹಿಸಲಾಗದ ಸಂಕಟವಾಗಿತ್ತು. ಹೆಣ್ಣು ಮಗುವಿಗೆ ಜನ್ಮವಿತ್ತು ತನ್ನ ಇಹದ ಯಾತ್ರೆಯನ್ನು ಮುಗಿಸಿ ಹೋದ… Read more…

  • ಅಮ್ಮ

    ‘ಅಮ್ಮನ್ಗೆ ಯಿಡೀ ರಾತ್ರೆಲ್ಲ ವಾಂತಿ ಭೇದಿ ವುಬ್ಸ ಆಯಾಸ... ಕುತ್ರೂಸಾ... ಬಾಳಾ ಯೆಚ್ಕುಡ್ಮೆಯಾಗಿ ರಾಮ್ಪಾರ್ದ ಡಾಕಿಟ್ರಾತ್ರ ತೋರ್ಸಿದ್ರು ಗುಣಾಗಿಲ್ಲ! ನೀ ಆದಷ್ಟು ಗಡಾನೇ ವೂರ್ಗೆ ಬಾಣ್ಣ...’ ಸೇಕ್ರಿ,… Read more…