ಲೆಕ್ಕ ಹಾಕಿಲ್ಲ ಎಷ್ಟು?
ಲೆಕ್ಕಕ್ಕೆ ಸಿಗದವುಗಳೆಷ್ಟೋ?
ಹೆತ್ತ ಕಂದಮ್ಮಗಳನ್ನೆ
ಹೆಣ್ಣೆಂದು ಜರೆದು ಹೆರಳು
ಹಿಡಿದು ಕುಟುಕಿದ ಹೆಂಬೇಡಿಗಳೆಷ್ಟು?
ಮುಗ್ಧ ಪ್ರೇಮದ ಗೀತೆಗೆ
ಮದಿರೆ ಹಾಡನು ಕೂಡಿಸಿ
ಮಂಚಕ್ಕೆ ಎಳೆದು
ಮಾನ ಪ್ರಾಣ ಮರ್ಧಿಸಿದ
ನಯವಂಚಕರೆಷ್ಟು?
ಹಾದರದ ಹೆಸರಿಕ್ಕಿ
ಹಾಡುಹಗಲೇ ಹರಣ ಹಿಂಡಿದ
ಹೆಂಡಿರ ಗಂಡರೆಷ್ಟು?
ಆಸ್ತಿಯಾಸೆಗೆ ಆರತಿಯ ವರಿಸಿ
ರೂಪಸಿಯರೊಡನೆ ರಮಿಸುವ
ಘಾತುಕರೆಷ್ಟು?
ದುಡ್ಡಿಗಾಗಿ ಧರ್ಮಪತ್ನಿಯ
ಪೀಡಿಸುವ ಹತ್ಯೆಗೈಯುವ
ವರದಕ್ಷಿಣೆ ಭೂತಗಳೆಷ್ಟು?
ಅರ್ಥೇಚ, ಕಾಮೇಚ, ಧರ್ಮೇಚ
ಎಂದು ತಾಳಿಭಾಗ್ಯವ ನೀಡಿ
ಕಟ್ಟಿದ ತಾಳಿಯ ಮಾರಿ
ಕುಡಿದುಂಡು ಮೋಜು ಮಸ್ತಿಯ
ಗೈವ ಗತಿಹೀನರೆಷ್ಟು?
ಲೆಕ್ಕ ಹಾಕಿಲ್ಲ ಎಷ್ಟು?
ಲೆಕ್ಕಕ್ಕೆ ಸಿಗದವುಗಳೆಷ್ಟೋ?
*****
