ಸುಳ್ಳು ಸತ್ಯ ಇಲ್ಲ ತಥ್ಯ
ಗೆಲುವು ಒಂದೆ ನಮ್ಮ ಗುರಿ
ಒಳ್ಳೆತನವು ಮಳ್ಳತನವು
ಬಲವು ಇದ್ದರಲ್ಲಿ ಸರಿ
ಬಾಳಿದೊಂದು ಸಮರದಂತೆ,
ನುಗ್ಗು ನುಗ್ಗು ಮುಂದಕೆ
ವೇಳೆಗಳೆಯ ಬೇಡ ಸಾಗು
ಬೀಳಬೇಡ ಹಿಂದಕೆ!
ಬಾಳಿಗಿಹುದು ಒಂದೆ ಸೂತ್ರ
ಬಾಳುವುದೇ ಪೂರ್ಣ ಅರ್ಥ
ಗಾಳಿ ಬೀಸುತಿಹುದೆ ಸಾರ್ಥ
ನೀತಿ ನೇತಿ ಎಲ್ಲ ವೃರ್ಥ!
ಜತೆ-ಜೊತೆಗಳನರಸಬೇಡ
ಹಿತವಹಿತಕೆ ಮರುಗಬೇಡ
ಕ್ರತು ಧರ್ಮವ ತೊರೆಯ ಬೇಡ
‘ಮಿಜಿ ಮಿಜಿ’ ನೀ ಮಾಡಬೇಡ
ಬಿದ್ದರೇನು ಮತ್ತೆ ಏಳು
ಎದ್ದೆನೆಂದು ಒತ್ತಿ ಹೇಳು!
ಗೆದ್ದ ಹೊರತು ಬಾಳು ಹಾಳು
ಇದ್ದುದೆಲ್ಲ ಗಾಳು ಗೀಳು!
ಆಳುವುದೇ ನಮ್ಮ ಧರ್ಮ
ಬಾಳುವುದೇ ನಮ್ಮ ಕರ್ಮ
ಬೀಳದಿಹುದೆ ಮೂಲ ಮರ್ಮ
ಇದನುಳಿದುದು ಬರಿ ಅಧರ್ಮ!
ನಿಂತವರೇ ನೆಲಕೊಡೆಯರು
ಸಂತೆಯ ಜನ ಉಳಿದವರು
ಚಿಂತಿಸದಿರು ಅವರಿವರು
ಇಂತಿರುವರೆ ನಮ್ಮವರು!
ಗೆಲವು ಪುರುಷ ತೊಟ್ಟ ಛಲವು
ನೀತಿ ನಿಯಮ ಇಲ್ಲಿ ಇಹವು;
ಬಲವು ನಮ್ಮದೊಂದೆ ಅಳವು
ಅದುವೆ ನಮ್ಮ ಧೀರ ದಳವು!
ಮನುಜ ಕುಲದ ಮೂರ್ತಿ ನೀನು
ಮನುಮನಸಿನ ಸ್ಫೂರ್ತಿ ನೀನು
ಮನುವಂಶಕೆ ಕೀರ್ತಿ ಭಾನು
ಇಲ್ಲ ನಿನಗೆ ಸರಿ ಸಮಾನು!
ನೀನು ಗೆದ್ದ ಗೆಲವು ಮನುಜ-
ರೆತ್ತಿ ಕೊಳ್ಳುವ ಅಮೃತ ಫಲವು;
ನೀನು ಬಿದ್ದು ಎದ್ದ ನೆಲವು
ಇದನು ಬಿತ್ತಿ ಬೆಳೆದ ಹೊಲವು!
ಸುಳ್ಳು ಸತ್ಯ ಇಲ್ಲ ತಥ್ಯ
ಗೆಲವು ಒಂದೆ ನಮ್ಮ ಗುರಿ!
ಒಳ್ಳೆತನವು ಮಳ್ಳತನವು
ಬಲವು ಇದ್ದರಲ್ಲಿ ಸರಿ!
*****
