ಮದುವೆಮನೆ ಗಡಿಬಿಡಿಯೊಳೆಂತೊ ವಧುವಿಗೆ ಬಿಡುವು
ದೊರೆತಿರಲು, ನೆರೆದ ಜನ ಮುಂದಿನದೆ ಯೋಚಿಸಿರೆ
ಆಗೆನ್ನ ಕೋಣೆಗಾರೋ ಬಂದು, ಕುಸಿಯುತಿರೆ
ಅಸಿನಡುವು, ಹೆಚ್ಚುತಿರೆ ಕಣ್ಣನೀರಿನ ಮಡುವು
ಎನ್ನನಪ್ಪಿದಳಲಾ! ಕಣ್ಣ ತೆರೆದರೆ ಹೆಣ್ಣು!
“ಓ! ನಲ್ಲ! ನೀನು ಕಟ್ಟುವ ತಾಳಿಯನ್ನಿಗರು
ಕಟ್ಟದರು! ದೊರೆವರೇ ನಿನ್ನ ತೆರ ಚೆನ್ನಿಗರು?”
ಎಂದೊರೆಯೆ ಕನಸೊಡೆದು ನಿಶೆಯ ವರಿಸಿತು ಕಣ್ಣು!
ಹೇ! ಸ್ವಪ್ನದೇವತೆಯೆ! ನನ್ನ ಜಾಣ್ಮೆಗೆ ಸರಿಯ
ಕಾಣೆ ನಾಂ! ಆ ಚದುರೆ ನಿದ್ದೆವೆಣ್ಣಿನ ತೋಳ
ಬಿಗಿತೆಕ್ಕೆಯಿಂದೆಂತೊ ಸಡಿಲಿಸುತ್ತೆನ್ನತುಳ
ಜಾಣ್ಮೆಯಿಂ, ಪ್ರಿಯೆಯ ಮಧುರಾಲಿಂಗನದ ಸಿರಿಯ-
ನಿತ್ತೆ. ಮರು ಚಣವೆ ಅದನೆಳೆದು ಬಿಡಿಸುತ ಕಿತ್ತೆ!
ಎಂದು ಕಾಂಬುದು ನಾನು ಆ ಕನಸನೇ ಮತ್ತೆ?
*****
