ಸಾವಿರ ಭಾಷೆ ಸಾವಿರ ವೇಷ
ನಮ್ಮದು ಭಾರತ ದೇಶ
ಸೌಹಾರ್ದದ ಹಾಲ್ಗಡಲಿನ ಒಳಗೆ
ಯಾತಕೊ ಕೋಮು ದ್ವೇಷ? || ಪ ||
ಸ್ವತಂತ್ರ ಭಾರತಕರವತ್ತು
ಅಭಿವೃದ್ಧಿಯ ರಥ ಚುರುಕಲ್ಲ
ಉಳ್ಳವರಿಗೆ ಆಕಾಶ ಸಲೀಸು
ಸರ್ವೋದಯಕೆಡೆ ಇಲ್ಲಿಲ್ಲ
ಇದು ಯಾಕೆ ಯಾರಿಗೆ ಶೋಭೆ?
ಕಾಣದೆ ಕಣ್ಣಿಗೆ ಆದೆವೆ ಗೂಬೆ!
ವಿಶಾಲ ಭಾರತ ವಿಶಾಲವೆ
ಆದರು ಸಮಾಜ ಕಿಷ್ಕಿಂದೆ
ನಿಸರ್ಗ ಸಂಪತ್ತಿಗೆ ಬರವೆ?
ಆದರು ಉಣ್ಣಲು ದಾರಿದ್ರ್ಯವೆ!
ಇಂತಹ ವೈರುಧ್ಯ ಇದೆ ಯಾಕೆ?
ಒಳಗಿರುವ ತಿಳುವಳಿಕೆ ಸಾಕೆ?
ಹೇಳುವೆವು ಭಾರತವು ಮಹಾನ್
ಸೊರಗಿದ್ದರೂ ದೇಹ
ಇದರ ನಡುವೆಯೆ ಹೊಸ ವಿದ್ವೇಷ
ಕಳಚುತಿಲ್ಲ ನಾವ್ ಇದರ ವೇಷ;
ಭದ್ರ ಭಾರತವ ಕಟ್ಟುವಲಿ
ಹೊಸ ಇತಿಹಾಸವ ಬರೆಯುವಲಿ
*****
