ಕೂಲಿಗಳು ನಾವು

ಹಿಂದು, ಮುಸ್ಲಿಂ, ಕ್ರಿಶ್ಚಿಯನ್
ಅವರಲ್ಲಿ ಮಾನವರನ್ನು ಹುಡುಕುತ್ತಲಿರುವೆ.
ಈ ನೆಲದ ಮಣ್ಣಲ್ಲಿ ಮಣ್ಣಾಗಿ ಹೋದ
ಅವರ ರಕ್ತದ ಕೆಂಪು ಕಲೆಗಳ ಹುಡುಕುತಲಿರುವೆ.

ದೇಶದ ಯಾವ ಮೂಲೆಯಲ್ಲಾದರೂ
ಯಾರೋ ಬಾಂಬು ಸಿಡಿದರೂ ಸಾಕು,
ಅಲ್ಲಿ ನನ್ನದೇ ಹೆಸರು ಮೊದಲು
ಏನು ಮಾಡಲಿ ಬಾಳು ಹಸನಾಗಲು
ರಿಕ್ಷಾ ಹೊಡೆದು ಹೊಟ್ಟೆ ಹೊರೆಯುತ್ತಿರುವೆ.

ವಿಶ್ವದ ಯಾವ ಮುಲೆಯಲ್ಲಾದರೂ
ಯಾರೋ ಕೋಮು ದಂಗೆ ಮಾಡಿದರೂ ಸರಿಯೇ
ಅಲ್ಲಿ ನನ್ನ ಹೆಸರೇ ಮೊದಲು
ಏನು ಮಾಡಲಿ ಹೊಟ್ಟೆಯ ಹಸಿವು ಹಿಂಗಿಸಲು
ದಣಿಯ ಹೊಲದಲ್ಲಿ ನೇಗಿಲು ಹೂಡಿರುವೆ.

ಲೋಕದ ಯಾವ ಮೂಲೆಯಲ್ಲಾದರೂ
ಯಾರೋ ಜನಾಂಗೀಯ ದ್ವೇಷದ ಬೆಂಕಿ ಹಚ್ಚಿದರೂ
ಅಲ್ಲಿ ನನ್ನ ಹೆಸರೇ ಮೊದಲು ಬರುವುದು
ಬೆಂಕಿಯಲಿ ಮೊದಲು ಬೇಯುವವರು ನಾವು.
ಏನು ಮಾಡುವುದು ಬಡತನದಲ್ಲಿ ಬೆಂದವರು
ಹೋಟೆಲ್, ಗ್ಯಾರೇಜ್ ಕೂಲಿಗಳು ನಾವು.

ನಾಡಿನ ಯಾವ ಮುಲೆಯಲ್ಲಾದರೂ
ದೊಂಬಿ, ಗಲಭೆಯಾದರೂ ಸಾಕು
ರಸ್ತೆಯಂಚಿನ ನನ್ನ ಗೂಡಂಗಡಿ
ತಳ್ಳುಬಂಡಿಗಳೇ ಮೊದಲು ಬಲಿಯಾಗುವವು.
ಏನು ಮಾಡಲಿ ಮಡದಿ ಮಕ್ಕಳ ಸಾಕಲು
ಗಂಜಿಗಾಧಾರ ತಳ್ಳುಬಂಡಿಯನೇ ನಂಬಿರುವೆನು.
*****