ಪಂಚ್ಮಿ ಬಂದೇತೆ ಪಂಚೇತ್ಯಾಗೇತೆ
ಪುಂಗಿ ತಂಗಿಲ್ಲಾ ||ಪಲ್ಲ||
ಮೋಸಂಬ್ವನದಾಕಿ ತೆಂಗಿನ್ ಬನದಾಕಿ
ಇದ್ದಿದ್ಹಾಂಗ ಇಲ್ದಂಗಾದಿಯಾ
ಗಿಣಿಮೂಗು ಚಲುವಾಕಿ ಹೊಳಿತುಂ ಜಡಿಯಾಕಿ
ಅಗಸಿ ಆಚಿ ಚೊಗಚಿ ಆದಿಯಾ ||೧||
ಕಡೆಕಡೆ ಪಂಚ್ಮ್ಯಾಗಿ ಕಲ್ಲಂಗ್ಡಣ್ಣಾಗಿ
ಗಲ್‍ಗಲ್ಲಂತ ಕಲ್‍ಕಲ್ಲಾದಿಯಾ
ಅಣೋರಣ್ಣಣ್ಣಾ ಸುಳ್ಳಾರ್ ಸುಣ್ಣಣ್ಣಾ
ಸುಳ್‍ಸುಳ್ಳಂತ ಮಣ್‍ಮಣ್ಣಾದಿಯಾ ||೨||
ಜೂರ್‌ಜೂರ್ ಜೋಲಿನಾ ಜೋಕಾಲ್ಮ್ಯಾಲಿನಾ
ಜೀಕ್‍ಜೀಕ್ಕೊಂತ ಜೀವಾ ಕೊಂದಿಯಾ
ಬರ್ತೇನಣ್ಣಣ್ಣಾ ಬಂಗಾರಣ್ಣಣ್ಣಾ
ಅನ್ ಅನ್ಕೊಂತ ಬಾವಿಬಿದ್ದಿಯಾ ||೩||
ಬಾರ್‌ಬಾರಣ್ಣಣ್ಣಿ ಅಂಜೂರಣ್ಣಣ್ಣಿ
ತಾರೆ ಬಾರೆ ಯಾರೆ ಆದಿಯಾ
ಚಂಚಂಚಂದಾಗಿ ಚಂಪಕ್ಕಾಗಾಗಿ
ಕುಂಚಿಗೊಂಬಿ ಕುಣಿಯಾಕ್ಕುಂತಿಯಾ ||೪||
ತೌರೂರ್ ತುಂತುಂಬ ನಿಮ್ಮವ್ ನಿಂಗವ್ವ
ಹುಚ್ಚುಚ್ಚಾಗಿ ಕಿಚ್ಚಾ ಹಾರ್‍ಯಾಳೆ
ಚಿಂಚಿಂ ಚಿನ್ನಪ್ಪ ಚಿನ್ನಪ್ ನಿನ್ನಪ್ಪ
ಬಾಯ್‌ಬಾಯ್ ಬಿಟ್ಟು ಬಾವಿ ಬಿದ್ದಾನೆ ||೫||
*****
