ಈ ನಶ್ವರದ ತನುವಿನಲಿ ಎಸೊಂದು ಆಸೆ
ಹೆಜ್ಜೆ ಹೆಜ್ಜೆಗು ತುಂಬುತ್ತಿದೆ ಪಾಪದ ಪಾತ್ರೆ
ಇಂದ್ರಿಯಗಳ ಸುಖಕ್ಕಾಗಿ ನಿತ್ಯ ಚಡಪಡಿಸಿ
ಸ್ವಾರ್ಥ ಸಾಧನೆಗಳಿಂದ ಮಾಡಿದೆ ಜಾತ್ರೆ
ಕಾಣದ ಮನಸು ಇದು ದಾರಿ ತಪ್ಪಿಸುತ್ತಿದೆ
ಮೋಹಕ್ಕಾಗಿ ನಿತ್ಯ ನಿತ್ಯ ದುಡುಕುತ್ತಿದೆ
ಬಿದ್ದು ಹೋಗುವ ಶರೀರದಿ ಸುಖವ ಬಯಸಿ
ಕರ್ಮಗಳ ಸಂಚಯಿಸಿ ಶಾಂತಿ ಹುಡುಕುತ್ತಿದೆ
ಜನುಮ ಜನುಮಗಳಲು ಹೀಗೆ ಮಾಡಿ
ಭೋಗಲಾಲಸೆಗಳಲಿ ಬೆಂಡು ಬೆಂಡಾಗಿದೆ
ದೇವನ ತಾಣದಿಂದ ದೂರ ದೂರ ಸರಿದು
ತನ್ನ ಸತ್ವವ ಮರೆತು ಜಿಗಿವ ಚೆಂಡಾಗಿದೆ
ಏಸು ಯುಗವ ಕಳೆದರೂ ಹೀಗೆ ಸುಖವೇ ಇಲ್ಲ
ಸುಖದ ಮರೀಚಿಕೆ ಭ್ರಮಿಸಿ ಅಪ್ಪುತ್ತಿದೆ
ಹರಿಯ ಧ್ಯಾನವೊಂದೆ ದಾರಿ ಎಲ್ಲವುಗಳಿಗೆ
ಮಾಣಿಕ್ಯ ವಿಠಲನಿಗೆ ನಿಜರೂಪ ಒಪ್ಪುತ್ತಿದೆ
*****
