ಹರಿಯೆ ನಿನ್ನ ನಂಬಿ ನಾನು ಬಾಳಿಹೆನು
ನನ್ನ ನೀನು ಕೈ ಹಿಡಿದು ನಡೆಸು ಬಾ
ನಿನ್ನ ತೊರೆದು ನಿನ್ನ ಮಾಯೆ ಬೇಡೆನಗೆ
ನಾನು ನಡೆದಲಿ ನೀನು ಜೊತೆಯಾಗಿ ಬಾ
ನೀನು ಕರುಣಾಸಿಂಧು ದಯಾಸಾಗರ
ನಿನ್ನೊಳಗೆ ಎಲ್ಲಿಹದು ಭೇದ ತಾರತಮ್ಯ
ಪಾಪಿಯಾಗಲಿ ದುರಾಚಾರಯಾಗಿರಲಿ
ಸಜ್ಜನರೆಲ್ಲರಿಗೂ ನಿನ್ನ ಕೃಪೆ ಅದಮ್ಯ
ನೀನು ರಚಿಸಿದೆ ಈ ಭವಸಾಗರ ಆಗರ
ನಿತ್ಯ ನಾನು ಇದರಲ್ಲಿ ಮುಳುಗಿ ತೇಲಿಹನು
ನಿನ್ನ ಪ್ರೀತಿಯೆಂಬ ನಾವೆ ನೀಡಿ ಎನ್ನ
ಬದುಕಿಸಬೇಕು ನೊಂದು ಬೆಂದಿಹನು
ಎನ್ನೆದೆಯಲಿ ಪುಟಿಯಲಿ ನಿನ್ನಪಡೆ ದಾಹ
ಅರೆಗಳಿಗೆ ನಿನ್ನ ಮರೆತು ನಾ ಬಾಳದಿರಲಿ
ನಿನ್ನ ರೂಪ ಎನ್ನ ಕಂಗಳಲ್ಲಿ ತುಂಬಿರಲಿ
ಮಾಣಿಕ್ಯ ವಿಠಲನಿಗೆ ಚೈತನ್ಯ ಧಾಮವಾಗಿರಲಿ
*****