ಪದವೊಂದು ಹಾಡ್ತೀನಿ
ಎದೆಯ ಕದ ತೆರೆದು ಕೇಳು
ನೋವುಂಡ ಸ್ವರ ತೇಲಿ ಬಂದಾವ,
ನೀಡಲಾರವು ಮುದವ
ತುಟಿತನ ಬಂದು ಹರಳುಗಟ್ಟಾವ,
ಹಗುರವಾಗಲಿ ಎದೆ ಅಂತ
ಪದವೊಂದು ಹಾಡ್ತೀನಿ…
ನಡೆಯುತ್ತ ನಡೆಯುತ್ತ
ದಾರಿ ಸವೆಯಲಿ ಎಂದು
ಮುಳ್ಳು ಬೇಲಿಯ ಹಾದಿ,
ಕಲ್ಲುಗಳು ಬಹಳ
ಅಂಗಾಲ ಗಾಯಕ್ಕೆ
ಬಾಮು ಸವರಲು ನಾನು
ಪದವೊಂದ ಹಾಡ್ತೀನಿ…
ಕವಿದ ಕತ್ತಲೆಯೊಳಗ ಬೆಳಕು
ಮೂಡೀತೆಂಬ ಹುಚ್ಚು ಭರವಸೆಯಲ್ಲಿ
ಕಿವಿಯಲ್ಲಿ ನಿನ್ನ ಹೆಜ್ಜೆಯ
ತಾಳ ತಪ್ಪದೇ ಇರಲೆಂದು…
ತಿರುಗಿ ನೋಡದೆ ತಿರುವಿನೊಳಗ
ನೀ ಜಾರಿ ಹೋಗುವ ಮುನ್ನ
ಪದವೊಂದ ಹಾಡ್ತೀನಿ…
ಗಾಳಿಯಲಿ ತೇಲಿದ ಪದಗಳ
ಅಲಿಗಳ ಮ್ಯಾಲೆ ಸವಾರಿ ಮಾಡಿ
ಬದಲಾದಾಗ ನಮ್ಮ ದಿಕ್ಕು
ನಾನೊಂದು ಬದಿ ನೀನೊಂದು ಬದಿ
ನಡುವ ಹರದೈತಿ ಸಮಯದಾ ನದಿ
ಆದರೂ ತಾಳದೆ ಎದೆಗುದಿ
ನಾನು ಪದವೊಂದ…
ಅರಿವು ಮರೆವಿನ ನಡುವಣ
ಗೆರೆಯು ತಾ ಬಲು ತೆಳುವು
ಧಾಟಿ ಮರೆಯುವ ಮುನ್ನ
ಎಲ್ಲರೂ ಬಲ್ಲರು
ಕಲ್ಲು ಕರಗದು ಎಂದು
ಹುಲ್ಲು ಚಿಗುರೀತೆಂದು
ಹುಂಬ ಭರವಸೆಯಿಂದ
ಪದವೊಂದು…
ನಾನು ನಾನಾಗಿರದೆ
ನಾನೆ ಪದವಾಗುವ ತನಕ
ಬಾನ ಕಿರಣದ ತಂತಿಯ ಮೀಟಿ
ಭುವಿಯ ಮದ್ದಳೆಯ
ತಕಧಿಮಿಗೆ ಕುಣಿಯುತ್ತಾ
ನಿಮ್ಮ ಕರಣ ಸೇರುವ ತನಕ
ಪದವೊಂದ ಹಾಡ್ತೀನಿ,
ನಾನು ಪದವೊಂದ ಹಾಡ್ತೀನಿ…
*****
