೧
ಬಾ ಮಗಳ ಬಾ ಮಗಳೆ ಬಾ ಮಗಳೆ ಮನೆಗೆ
ಹಾರೈಸಿ ಕುಳಿತಿಹೆನು ಬೇಗ ಬಾರಮ್ಮ
ಘನವಾದ ಮನೆತನದ ಮನೆಯಲ್ಲಿ ಬಂದೆ
ಮನೆಯವರ ಮನ್ನಣೆಗೆ ಮನೆಯಾಗಿ ನಿಂದೆ
ಬಾ ಮಗಳೆ ಬಾ ಮಗಳೆ ಬಾ ಮಗಳೆ ಮನೆಗೆ
ಹಾರೈಸಿ ಕುಳಿತಿಹೆನು ಬೇಗ ಬಾರಮ್ಮ
೨
ಬಾಲ್ಯದಲಿ ಲಾಲನೆಯ ಪಾಲನೆಯ ಗೆಯ್ದು
ಲೀಲೆಯಿಂದಲಿ ಬೆಳಸಿ ಕಾಲವನ್ನು ಕಳೆದೆ
ಹುಲುಸಾದ ಕಲೆಗಳನ್ನು ಕಲಿಸಬೇಕೆಂದು
ಕಲೆಗಳಿಗೆ ನೆಲೆಯಾದ ನಿಲಯವನು ತೋರ್ದೆ
ಬಾ ಮಗಳೆ ಬಾ ಮಗಳೆ ಬಾ ಮಗಳೆ ಮನೆಗೆ
ಬಾ ಮನೆಗೆ ಬೇಗದಿಂ ಬಾ ಮುದ್ದು ಗಿಣಿಯೆ
೩
ಪೊಳಲು ಹಳ್ಳಿಗಳೆಂಬ ತಿರುಳೆಲ್ಲ ತಿಳಿದು
ಪೊಳಲನ್ನು ಬಳಸುತ್ತ ಬಳೆಯುತ್ತ ಬಂದೆ
ಕುಲವಧೂಕಾಮಿನಿಯರೊಲವನ್ನು ಕಲಿತು
ಕುಲಶೀಲರೂಪಗಳ ಕಳೆಯನ್ನು ತಿಳಿದೆ
ಬಾ ಮಗಳೆ ಬಾ ಮಗಳೆ ಬಾ ಮಗಳೆ ಮನೆಗೆ
ಬಾ ಮನೆಗೆ ಬೇಗದಿಂ ಬಾ ಮುದ್ದು ಮಗಳೆ
ಮದುವೆಯನು ಹಮ್ಮಲು ಮನವನ್ನು ತೆಗೆದೆ
ವಿದುಷಿಮಣಿ ಮಾಡಬೇಕನ್ನುತ್ತ ಬಗೆದೆ
ಒಳಿತಾದ ಕಲೆಗಳನು ಕಲಿತಾದ ಬಳಿಕ
ಕೆಳೆಗೊಂಬ ಕುಲಜರನು ಕಾಣಬೇಕೆಂದೆ
ಬಾ ಮಗಳೆ ಬಾ ಮಗಳೆ ಬಾ ಮಗಳೆ ಮನೆಗೆ
ಭಯರಹಿತ ಬಗೆಯಿಂದ ಬಾ ಮಗಳೆ ಬೇಗ
೫
ಶಾರದಾ ಕಾಯಿದೆಯು ಕವಲೊಡೆವ ಮುಂಚೆ
ನೂರಾರು ಲಗುನಗಳ ನೆರೆಯೆಲ್ಲ ನೋಡೆ
ತಂದೆತಾಯ್ಗಳ ತೆರೆದ ಬಂಧುಜನವೆಲ್ಲ
ಬಂಧಿಸಿತು ನನ್ನನ್ನು ಸಂಧಿಸಲು ನಂಟ
ಬಾ ಮಗಳೆ ಬಾ ಮಗಳೆ ಬಾ ಮಗಳೆ ಮನೆಗೆ
ಬೇಗದಿಂ ಬಾರವ್ವ ಹಾರೈಸಿ ಇಹೆನು
೬
ವರಸುಧಾರಕನಾಗಿ ಮೆರೆದಿರುವ ನಾನು
ಪರಿಣಯವ ವಿಧಿಸುವೆನೆ ಜವ್ವನದ ಮುಂಚೆ
ಲೇಸಲ್ಲ ಮದುವೆಯಿದು ಮನದಿಂದ ಬಗೆದೆ
ಹಾಸಿಗೆಯ ಹಿಡಿದಿರುವ ಹೆಂಡತಿಯ ಕೇಳ್ದೆ
ಬಾ ಮಗಳೆ ಬಾ ಮಗಳೆ ಬಾ ಮಗಳೆ ಮನೆಗೆ
ಬೇಗದಿಂ ಬಾರವ್ವ ನಮ್ಮವ್ವ ನೀನು
೭
ಸಾವಿನ್ನು ಸೆರೆಗೆಯ್ವ ಮುನ್ನಮೆ ನನ್ನ
ಭಾವನೆಯ ಮುಗುಳಾದ ಮಗಳ ಮದುವೆಯನು
ನಮ್ಮಯ್ಯ ದಮ್ಮಯ್ಯ ಹಮ್ಮುವೆನು ಎಂದು
ದುಮ್ಮಾನದಿಂದುಸಿರೆ ಹಮ್ಮಿದೆನು ಸೆರೆಯ
ಬಾ ಮಗಳೆ ಬಾ ಮಗಳೆ ಬಾ ಮಗಳೆ ಮನೆಗೆ
ಕಳವಳವ ಕಳೆದುಳಿದ ಕತದಿಂದ ಬಾರೆ
೮
ಅರಿಯದಿಹ ಮನೆತನಕೆ ಅರಿಯದಿಹ ಜನಕೆ
ಸಿರಿವಂತರೆಂದೆಂಬ ಹಳ್ಳಿ ಮುರುಕರಿಗೆ
ಬಂಧುಗಳು ಬಲವಂತ ಮಾಡಲಾಕ್ಷಣದೆ
ಸಂಧಿಸಿದೆ ಸಂಬಂಧವನು ತಂತಿಮುಖದೆ
ಬಾ ಮಗಳೆ ಬಾ ಮಗಳೆ ಬಾ ಮಗಳೆ ಮನೆಗೆ
ಬಾರವ್ವ ತವರೂರ ತಾಯ್ಮನೆಗೆ ನೀನು
೯
ಹೊರಬಾರದೊಜ್ಜೆಯನು ಹೊರಿಸಿದರೆ ನಿನಗೆ
ಉಣಬಾರದುಣಿಸನ್ನು ತಿನಿಸಿದರೆ ನಿನಗೆ
ಹೊಲೆತನದ ಮಾತನ್ನು ಕುಲಕೆಲ್ಲ ಬಳಿಸಿ
ಕುಲವೆಲ್ಲ ಪಾವನವ ಗೆಯ್ದರೇನಮ್ಮ
ಬಾ ಮಗಳೆ ಬಾ ಮಗಳೆ ಬಾ ಮಗಳೆ ಮನೆಗೆ
ಸಿರಿವನೆಯ ಸೆರೆ ಬೇಡ ತಿರಿದುಂಬ ಬಾರೆ
೧೦
ಅತ್ತೆನಾದಿನಿಯರಿಗೆ ತುತ್ತಾಗಲಿತ್ತೆ
ಚಿತ್ತಚಂಚಲಮಾಗೆ ಬಿತ್ತರಿಸಿಯಿತ್ತೆ
ಹುಚ್ಚೆದ್ದು ಕಾಲ್ಮುರಿಯೆ ಹೊಯ್ವ ಗಂಡನಿಗೆ
ನೆಚ್ಚುವದದೆಂತಕಟ ಹಾ ದೇವ! ಎಂದ
ಬಾ ಮಗಳೆ ಬಾ ಮಗಳೆ ಬಾ ಮಗಳೆ ಮನೆಗೆ
ಕಡಲಿಡುವ ಕಂಬನಿಯೊಳಲೆದಾಡಿ ಬಾರೆ
೧೧
ಊರೆಲ್ಲ ಸೇರದಿಹ ಸಿರಿವನೆಯ ಸೆರೆಗೆ
ತೂರಿದೆನೆ ನಿನ್ನನ್ನು ಹೊಣೆಗಾರನಾಗಿ
ಮೀರಿರ್ದ ಮರುಕವನು ಮರೆವೆ ನಾನೆಂತು
ದೂರವಿರು ನಮ್ಮವ್ವ ಕಂದವ್ವ ನೀನು
ಬಾ ಮಗಳೆ ಬಾ ಮಗಳೆ ಬಾ ಮಗಳೆ ಮನೆಗೆ
ಬೆಚ್ಚದಲೆ ಬೆದರದಲೆ ಬಾರವ್ವ ನೀನು
೧೨
ವಿಧಿಬರಹಕಿದಿರಾದೆ ಎಂದೆಂಬ ಮಾತು
ಉದಯಿಸದು ಹೃದಯದಲಿ ನಾಗೆಯ್ದ ತಪ್ಪೆ
ಎದುರಾಗಿ ಬರುತಿಹುದು ದುಗುಡದಿಂ ಕೂಡಿ
ಇದಿರಾಗ ಬೇಕಾಯ್ತು ಮಾಡಿದನುಚಿತಕೆ
ಬಾ ಮಗಳೆ ಬಾ ಮಗಳೆ ಬಾ ಮಗಳೆ ಮನೆಗೆ
ಬೇಗದಿಂ ತೊರೆಯವ್ವ ಸಿರಿವನೆಯ ಸೆರೆಯ
೧೩
ಸಂಸ್ಕಾರ ಹೊಂದಿರುವ ಮಗಳನ್ನು ತಂದು
ಸಂಸ್ಕಾರ ಹೊಂದದಿಹ ಮನೆತನಕೆ ನೀಡೆ
ಬರುತಿರುವ ಕಷ್ಟಗಳ ಗುರು ಮುಖದೆ ಕೇಳ್ವ
ಗುರುತನದ ಗುರಿಗಾಗಿ ಇತ್ತೆನೇನಮ್ಮ
ಬಾ ಮಗಳೆ ಬಾ ಮಗಳೆ ಬಾ ಮಗಳೆ ಮನೆಗೆ
ಬಾರವ್ವ ಬೇಗದಿಂ ತೊರೆಯುತ್ತ ಸರೆಯ
೧೪
ಕಲೆಗಳಿಗೆ ನೆಲೆಯಾದ ಕುಲವಧೂಜನರ
ಕಲೆನೋಡಿ ಕುಲನೋಡಿ ಲಗುನವನು ಗೆಯ್ಯೆ
ಕುಲವು ಪಾವನವು ಮೇಣ್ ಸಂಸ್ಕೃತಿಯ ಸಿರಿಯ
ಕೊಲೆಯಾಗದುಳಿಯುವದು ನೆಲದಲ್ಲಿ ಬಲಿತು
ಬಾ ಮಗಳ ಬಾ ಮಗಳೆ ಬಾ ಮಗಳೆ ಮನೆಗೆ
ಬಾರವ್ವ ಬೇಗದಿಂ ಕಂದವ್ವ ನೀನು
೧೫
ಕೆರೆಬಾನಿ ಕಟ್ಟೆಗಳ ತಿಳಿದೆಲ್ಲ ನೋಡಿ
ಪಿರಿದಾದ ಹರಣವನು ತೊರೆಯಲ್ಕೆಯೆಳಸಿ
ಕರುಣಾಳು ದೇವಂಗೆ ಮೊರೆಯಿಟ್ಟು ನೀನು
ಸೆರೆಯಾಳು ತನದಿಂದ ಮರೆಯಾದೆಯೇನೆ
ಬಾ ಮಗಳೆ ಬಾ ಮಗಳೆ ಬಾ ಮಗಳೆ ಮನೆಗೆ
ಧರೆಯನ್ನು ಧರಿಸಿರುವ ದೊರೆಯ ಸಿರಿವನೆಗೆ
೧೬
ಬಂಧುಭಗಿನಿಯರೆಲ್ಲ ಬಿಕ್ಕುತ್ತಲಳಲೆ
ತಂದಿರ್ದ ತಾಯಮ್ಮ ಹಿಂದಾದ ಮಾತ
ಹೊದಿಸುತ ಹಲಬುತ್ತ ನೆಲವನ್ನೆ ಹಿಡಿಯೆ
ಬ೦ದಿರ್ದ ದಂದುಗವ ನೀಗಿಸುವರಾರೊ
ಬಾ ಮಗಳೆ ಬಾ ಮಗಳೆ ಬಾ ಮಗಳೆ ಮನೆಗೆ
ಧರೆಯನ್ನು ಧರಿಸಿರುವ ದೊರೆಯ ಸಿರಿವನೆಗೆ
೧೭
ಸಂಸಾರ ತಿರುವಿನಲ್ಲಿ ಸಿಲುಕಿರುವ ನಾನು
ಸಂಸಾರ ಸಾಗರವ ಸಾಹಸದೆ ದಾಂಟಿ
ತಿರೆಗಾಗಿ ತಂದಿರುವ ದೊರೆಯ ಚರಣವನು
ಪರಮ ಹರುಷದೆ ಸೇರಿ ಕಾಂಬೆ ನಾ ನಿನ್ನ
ಬಾ ಮಗಳೆ ಬಾ ಮಗಳೆ ಬಾ ಮಗಳೆ ಮನೆಗೆ
ಧರೆಯನ್ನು ಧರಿಸಿರುವ ದೊರೆಯ ಸಿರವನೆಗೆ
*****
