ಯೆಂಡ ಮುಟ್ದಾಗ್ಲೆಲ್ಲ ನಂಗೆ
ಏನೋ ಕುಸಿಯಾಗೈತೆ!
(ಕುಡಕನ್ ಮಾತ್ ಅಂದ್ರಂಗೆ ಅಲ್ಲ!
ನೆಗ ಉಕ್ಕ್ ಬರತೈತೆ?) ೧
ಈಚಲ್ ಮರದಲ್ಲ್ ಮಲಗಿದ್ದ್ ಯೆಂಡ
ಕಟ್ಟಿದ್ ಮಡಕೇಗ್ ಅರ್‍ದು
ಬಾರಿ ಪೀಪಾಯ್ನಾಗ್ ಇಳಕೊಂಡಿ
ತುಂಬ್ಕೋಂತೈತೆ ಸುರ್‍ದು. ೨
ಅಲ್ಲಿಂದ್ ಇಲ್ಗೆ ಇಲ್ಲಿಂದ್ ಅಲ್ಗೆ
ಪೀಪಾಯ್ನಲ್ಲ್ ಉಳ್ಳಾಡಿ
ಕುಡಕನ್ ಬುಂಡೇಲ್ ಉಟ್ಕೋಂತೈತೆ!
ಎಂತಾ ಜನ್ಮ ನೋಡು! ೩
ರಬ್ಬರ್ ಚೆಂಡನಂಗ್ ಅಲ್ಲಿಂದ್ ಇಲ್ಗೆ
ಯೆಂಡ ಉಳ್ಳಾಡ್ತಿದ್ದು
ಕೊನೆಯಾಗ್ ಸಾಂತಿ ಕಂಡ್ಕೋಂತೈತೆ
ಕುಡಕನ್ ಒಟ್ಯಾಗ್ ಬಿದ್ದು! ೪
ಸಿಕ್ಕಿದ್ ದೇಅ ತಬ್ಬಿಡಕೊಂಡಿ
ಆತ್ಮ ಅಲಿಯೋವಂಗೆ
ಯೆಂಡ ಅಲದಿದ್ ನೆಪ್ ಮಾಡ್ಕಂಡ್ರೆ-
ಮೈ ಝುಂ ಅಂತದ್ ನಂಗೆ! ೫
ಬ್ರಮ್ಮ ಅನ್ನೋ ಅದರಲ್ಲ್ ಆತ್ಮ
ಬೆರಕಂಡ್ ಓಗೋವಂಗೆ
ಬೆಸಕೊಂತೈತೆ ಮೈನಾಗ್ ಯೆಂಡ
ಗುರತೇ ಗೊತ್ತಾಗ್ದಂಗೆ! ೬
ಯೆಂಡ ಮುಟ್ದಾಗ್ಲೆಲ್ಲ ನಂಗೆ
ಏನೋ ಕುಸಿಯಾಗ್ತೈತೆ!
ಕುಸೀಗ್ ಕಾರಣ ಗೊತ್ತಾಯ್ತೀಗ-
ಕುಣಿಯೋವಂಗ್ ಆಯ್ತೈತೆ! ೭
*****
