ಕಣ್ಣೋಟವೋ . . . ಚೆಲ್ಲಾಟವೋ . . . ನೀನು
ಕಣ್ಣಲ್ಲೆ ನುಡಿದ ಮಾತು
ಕವಿತೆಯಾಗಿದೆ; ನನ್ನ ಕವಿಯ ಮಾಡಿದೆ – ನಿನ್ನ
ಹೆಜ್ಜೆಯಲ್ಲಿ ಕಂಡ ನಡಿಗೆ
ನವಿಲು ಆಗಿದೆ; ಪ್ರೀತಿ ಸೋನೆ ಸುರಿಸಿದೆ//
ಕೆಂಪಾಗಿದೆ . . . ರಂಗೇರಿದೆ . . . ನಿನ್ನ
ಕೆಂಪಾದ ಕೆನ್ನೆಯಲ್ಲಿ ಗುಲಾಬಿ ಇದೆ – ಅದರ
ಒಂದೊಂದು ದಳವು ನನ್ನ ಹಗುರ ಮಾಡಿದೆ
ಮುಂಗುರುಳಲಿ . . . ಮುಂಗಾರಲಿ . . . ಅವಿತ
ನೂರೊಂದು ಕನಸು ಕರೆ ನೀಡಿದೆ – ಅದರ
ಒಂದೊಂದು ಝಲಕು ನನ್ನ ಕಳೆದಿದೆ
ಸೊಗಸಾಗಿದೆ . . . ಸೊಬಗೇರಿದೆ . . . ನಿನ್ನ
ತುಟಿಯಲ್ಲಿ ಕಂಡ ಲಾಸ್ಯ ಚಿತ್ತಾರವಾಗಿದೆ – ನನ್ನ
ಎದೆಯ ಬಾಗಿಲಲ್ಲಿ ರಂಗೋಲಿಯಾಗಿದೆ
ಮೌನರಾಗವೋ . . . ಮೋಹ ಪಾಶವೋ . . . ನಿನ್ನ
ಕಣ್ಣ ಗೂಡಿನಲ್ಲಿ ಬಂಧಿಯಾಗಿಹೆ – ನನ್ನ
ಬದುಕಿಗೆ ರೆಕ್ಕೆಪುಕ್ಕ ಮೂಡುತಿದೆ
*****
