ಚಿತ್ತ ಚಿತ್ತಾರದ ಭಾವಭಂಗಿಯಲಿ
ಸೆಳವಿಗೆದುರಾಗಿ ಬಿಂಕಬಿನ್ನಾಣಗಳಲಿ ಸುಳಿದಾಡಿ
ಮೇಲೇರಿ ಇಳಿಜಾರಕೆ ತೇಲಿಬಿದ್ದು
ಒಡಲಾಳಸೇರಿ ಕ್ಷಣಾರ್ಧದಲಿ ನೆಗೆದು
ತನ್ನೊಳಗೇ ಸ್ವರ್‍ಗ ಇಳಿಸಿಕೊಂಡು
ಕಣ್ಮನ ಸೆಳೆವ ಅಪ್ಸರೆ
ಹಂಗಿನರಮನೆಯ ಅಕ್ವೇರಿಯಂನೊಳಗೆ ಹೊರಳಾಟ
ಶುದ್ಧನೀರು ಗಾಳಿ ಉದುರಿಸಿದ ಪುಡಿಯೂಟ
ಸಹಜ ತೇಲುವಿಕೆಗೆ ಬಿಗಿಜಡತ್ವ
ಚೆಲ್ಲಾಟ ಚಿನ್ನಾಟಕೆ ಬೇಲಿ
ಪಿಳಿಪಿಳಿ ಕಣ್ಣುಬಿಟ್ಟದ್ದೂ ಕಣ್ಣೀರಿಟ್ಟದ್ದೂ
ನೀರೊಳಗೆ ಇಂಗಿಹೋಗಿ ಕೇಳಿಸದಂತೆ
ಕಾಣಿಸದಂತೆ ಅದೃಶ್ಯ
ಮಾತುಮೌನ ನಿರ್ಲಿಪ್ತ ಆವರಣ
ಬರುವೆಯಾ ಸೂರ್‍ಯ ಚಂದ್ರ ನೀನಾದರೂ ಬಾ
ಹಗಲುರಾತ್ರಿ ಹಂಬಲಿಸಿದ ಎದೆಗೂಡು ನಿಶ್ಯಬ್ದ…
ಅಪರಂಜಿ ಅರಮನೆಯ ಚೌಕಟ್ಟಿನೊಳಹೊರಗೆಲ್ಲ
ದೀಪಗಳ ಸರಮಾಲೆ ಮನದಾಳ ಕತ್ತಲೆಯ ಗೂಡು
ನೋವು ಹತಾಷೆ ಮಡುಗಟ್ಟಿ
ಕಣ್ಣುರೆಪ್ಪೆ ಮುಚ್ಚಿದರೂ ಒತ್ತಿದರೂ
ನಿದ್ದೆಯ ಸುಳುವಿಲ್ಲ.
*****
