ಕಾಲನು ಮುರಿಯದಿರಿ

ಕಾಲನು ಮುರಿಯದಿರಿ – ಕೋಳಿಯ
ಕಾಲನು ಮುರಿಯದಿರಿ ||ಪ||

ತನ್ನಯ ಪಾಡಿಗೆ ತಾನು ಎಲ್ಲೋ
ಆಯ್ಕೊಂಡ್ ತಿನ್ಕೊಂಡ್ ಇರುವಾಗ ||ಅ.ಪ||

ಅನ್ನವನ್ನು ಕೇಳುವುದೇ?
ಕುಡಿಯಲು ನೀರನು ಕೇಳುವುದೇ?
ಶಿಕ್ಷಣ ಕೊಡಿ ಎಂದು ಕೇಳುವುದೆ?
ಆರೋಗ್ಯವನ್ನು ಕೇಳುವುದೆ?
ಏನನು ಕೇಳದೆ ತನ್ನಯ ಪಾಡಿಗೆ
ಆಯ್ಕೊಂಡ್ ತಿನ್ಕೊಂಡ್ ಇರುವಾಗ . . . .
|| ಕಾಲನು ಮುರಿಯದಿರಿ ||

ಬಟ್ಟೆಯನ್ನು ಕೇಳುವುದೇ?
ತಟ್ಟೆಗೆ ಕೈಯನು ಹಾಕುವುದೆ?
ಸೊಟ್ಟಗೆ ಮೂತಿ ಮಾಡುವುದೆ?
ರಟ್ಟೆಯನ್ನು ತಟ್ಟುವುದೆ?
ಏನನು ಮಾಡದೆ ತನ್ನಯ ಪಾಡಿಗೆ
ಆಯ್ಕೊಂಡ್ ತಿನ್ಕೊಂಡ್ ಇರುವಾಗ . . . .
|| ಕಾಲನು ಮುರಿಯದಿರಿ ||

ಚಿನ್ನವನ್ನು ಕೇಳುವುದೇ?
ರನ್ನ ತಾವು ಎನ್ನುವುದೇ?
ಸಣ್ಣಗೆ ಮಾತನು ಆಡುವುದೆ?
ತಣ್ಣಗೆ ಚೂರಿಯ ಹಾಕುವುದೆ?
ಎಲ್ಲೊ ಏನೊ ತನ್ನಯ ಪಾಡಿಗೆ
ಆಯ್ಕೊಂಡ್ ತಿನ್ಕೊಂಡ್ ಇರುವಾಗ . . .
|| ಕಾಲನು ಮುರಿಯದಿರಿ ||
*****