ಯಾರು ಓದುವರು ನನ್ನ ಕವಿತೆ?
ಯಾರು ಹಾಡುವರು ನನ್ನ ಕವಿತೆ?|
ಯಾರು ಓದದಿದ್ದರೇನು
ಯಾರು ಹಾಡದಿದ್ದರೇನು|
ಬರೆಯುವೆ ನನ್ನ ಆನಂದಕೆ
ಬರೆಯುವೆ ನನ್ನಯಾ ಸಂತೋಷಕೆ|
ಬರೆಯುವೆ ಕನ್ನಡ ಪರಂಪರೆಯ
ಉಳಿಸಿ ಬೆಳೆಸಿದ ಹೆಮ್ಮೆಯ ಆತ್ಮತೃಪ್ತಿಗೆ||
ನೂರಾರು ಕನ್ನಡ ಕವಿಗಳ
ಸಾಹಿತ್ಯವ ಓದುವೆ
ಅವರಂತೆ ಬರೆಯಲು
ನಾ ಪ್ರಯತ್ನಿಸುವೆ|
ಅವರೆಲ್ಲರ ಕನ್ನಡತನವ
ಕಲಿಯಲಿಚ್ಚಿಸುವೆ
ಅವರಂತೆ ಕನ್ನಡ ಮೈಗೂಡಿಸಿ
ಬಾಳಲು ಆಶಿಸುವೆ ||
ಕನ್ನಡವಾಗಿದೆನ್ನ ಈ ತನು ಮನ
ಕನ್ನಡವಾಗಿದೆನ್ನ ಜೀವನ|
ಕನ್ನಡ ಬೆಳೆಸಲನುವಾಗಿ
ಸಾಗಿದೆನ್ನ ಅಳಿಲು ಸೇವೆ|
ಕುಗ್ಗದೆಂದಿಗೂ ಕರಗದೆಂದಿಗೂ
ಬತ್ತದೆಂದಿಗೂ ಬಾಡದೆಂದಿಗೂ
ಆರದೆಂದಿಗೂ ಈ ಮಹದಾಸೆ|
ಕನ್ನಡವೆಂದಿಗೂ ಅಳಿಯುವುದಿಲ್ಲ
ಕನ್ನಡ ಅಳಿಸಲು ಸಾಧ್ಯವಿಲ್ಲ|
ಕನ್ನಡಕ್ಕಿಂತ ಸುಂದರ, ಸುಮಧುರ
ಮುದ್ದಾದ ಲಿಪಿಯ ಭಾಷೆ ಇನ್ನೊಂದಿಲ್ಲ ||
*****
