ಎತ್ತಲಿಂದ ಬಂದೇವು ನಾವಿಲ್ಲಿ ತಿಳಿಯದೆ
ಬಿಚ್ಚಿಕೊಂಡು ಕರ್ಮದ ರಾಶಿ ಗಂಟಲ್ಲಿ
ಎತ್ತಲೊ ಸಾಗಬೇಕಿದೆ ದಾರಿ ತಿಳಿದಿಲ್ಲ
ಆದರೂ ಮಾಡಿದ್ದೇವೆ ಜಾತ್ರೆ ಇಲ್ಲಿ
ದೇಹಸಂಬಂಧಿ ನಮ್ಮವರೆಲ್ಲ ಸಾಗಿ
ಹಿಂಬಾಲಿಸಿಹರು ನನ್ನೊಂದಿಗೆ ಬಾಗಿ ಬಾಗಿ
ಯಾರ ಕರ್ಮದ ಗಂಟು ತಾವು ಬಿಡಿಸಿ
ಅರಿಯದೇ ಅನುಭವಹಿಸಿಹರು ಒಂದಾಗಿ
ಏಸೋ ವೇಳೆಯೋ ಹೀಗೆ ಜನ್ಮ ಕಳೆದು
ಮತ್ತೆ ಮತ್ತೆ ಇಲ್ಲೆ ಬುವಿಯ ವ್ಯವಹಾರ
ಭಾವಗಳಿಗೆ ಬಂಧನ ಗೆರೆ ಎಳೆಯದೆ
ಮತ್ತೆ ಮತ್ತೆ ಈ ವ್ಯರ್ಥ ಸಂಸಾರ
ಸಾಕಿನ್ನು ನಿದ್ದೆ ಎಚ್ಚರಗೊಳ್ಳಲಿ ನಾವು
ಅರೆಸಬೇಕು ಆ ಬೆಳಕ ಪ್ರಪಂಚ
ಮತ್ತೆ ಈ ಜನುಮ ಬೇಡದಂತೆ
ಮಾಣಿಕ್ಯ ವಿಠಲನೆಂಬ ತೂಗುಮಂಚ
*****
