ಒಂಟಿ ಗಿಡ

ಮರಳುಗಾಡಿನ ನಡುವ ಒಂಟಿ ಗಿಡ
ಹೂಬಿಡುವ ಬಾಯಾರಿಕೆ ಅದಕೆ
ನೀರು ತರುತ್ತೇವೆಂದು ಮುತ್ತಿಟ್ಟು ಹೋದವರು
ಬರಲಿಲ್ಲ ತಿರುಗಿ ಸಾವಿಲ್ಲದ ಬುಡಕೆ.

ಮುಂಗುರುಳಿಗೆ ಮುದ ಕೊಟ್ಟು
ಹೆಂಗರುಳ ಗೆದ್ದರು,
ಮನಸಿಗೆ ಮತ್ತೇರಿಸಿ ಮೈಮೇಲೆ ಬಿದ್ದರು.
ಗಿಡವ ಗರ್ಭಿಣಿ ಮಾಡಿ
ಗಿಳಿಪಾಠ ಒಪ್ಪಿಸಿದರು.
ಮರಳುಗಾಡಿನ ತುಂಬ ಮಹಡಿ
ಕಟ್ಟುತ್ತೇವೆಂದರು.
ತೊಟ್ಟಿಲ ತರುತ್ತೇವೆಂದು ಹೊರಟೇಹೋದರು!

ಇಲ್ಲಿ-
ಮರಳುಗಾಡಿನ ನಡುವೆ ಒಂಟಿ ಗಿಡ
ಮೇಲೆ ನೆಲಜಲಗಳ ದಾಟುವ ವಿಮಾನ
ಹಾರುತ್ತವೆ ಆಚೆಗೆ ಬರುತ್ತವೆ ಈಚೆಗೆ
ಇಲ್ಲಿಂದ ಅಲ್ಲಿಗೆ ಅಲ್ಲಿಂದ ಇಲ್ಲಿಗೆ
ತೂಗುತ್ತವೆ ತೊಟ್ಟಿಲು!
ಹುಟ್ಟದ ಮಗುವಿಗೆ ವಿಮಾನ ತುಂಬ
ಹಳಿಯಿಲ್ಲದ ರೈಲು ಆಟದ ಸಾಮಾನು
ಬಾಯಿ ಬಿಟ್ಟರೆ ಬಣ್ಣದ ಬಟ್ಟಲು
ಜಗಜಗಿಸುವ ಜಾಗತಿಕ ಜೋರಿಗೆ
ನೆಲ ಮುಟ್ಟದ ನೂರೆಂಟು ಕಮಾನು
ಹೊರಡಿಸುತ್ತಾರೆ ಪರಮಾನು.

ಮತ್ತದೇ ನೋಟ-
ಮರಳುಗಾಡಿನ ನಡುವೆ ಒಂಟಿ ಗಿಡ
ಬಣ್ಣಕ್ಕೆ ಬೆತ್ತಲಾಗಿ ಬಸುರಾದ ಗಿಡ
ಹೆರಲಾಗದ ಮಗುವಿಗಾಗಿ ನೋವು ತಿನ್ನುತ್ತದೆ
ಮೂಕಮಹಾಕಾವ್ಯ ಬರೆಯುತ್ತದೆ.
*****