ಸತ್ಯನಾರಾಯಣ ನಿತ್ಯಪಾರಾಯಣ
ಇತ್ತ ಬಾರೈ ಸ್ವಾಮಿ ನನ ಮನೆಗೆ
ಚಿತ್ತಯಿಸು ಎನ್ನ ಪ್ರಾರ್ಥನೆ ಎಲ್ಲವ
ವಿಸ್ತರಿಸುವೆ ನಿನ್ನ ಇದಿರೊಳಗೆ

ಶ್ರುತಿಯೊಳು ಯಾಮ ಯಾಮದಿ ನಿನ್ನ ಕಥೆಗಳ
ಕೇಳಿಹೆನುದ್ಭುತ ಚರಿತೆಗಳ
ವ್ರತವನ್ನು ಮಾಡುವೆ ಶಕ್ತ್ಯನುಸಾರದಿ
ಪರಿಹರಿಸೋ ಎನ್ನ ದುರಿತಗಳ

ನಾನಾವ ಬಗೆಯೊಳು ಪೂಜೆಯ ಮಾಡಲಿ
ಏನೇನ ಕಾಣಿಕೆಯರ್ಪಿಸಲಿ
ನೀನಿಲ್ಲದೊಸ್ತುವೆ ಕಾಣದು ಧರೆಯೊಳು
ತುಂಬಿರುವೇ ಅಣು ಘನಗಳೊಳು

ಧೂಪ ದೀಪ ಪುಷ್ಪ ನೈವೇದ್ಯದೊಳಗೆಲ್ಲ
ಅಪಾರ ಮಹಿಮನೆ ಅಡಗಿರುವೆ
ತಾಪಸೋತ್ತಮ ನಿನ್ ಪೂಜೆಯನರಿಯೆನು
ಶ್ರೀಪತಿ ನಿನಗೊಮ್ಮೆ ಕರಮುಗಿವೆ

ಸಾತ್ವಿಕ ಗುಣಗಳು ಚಲಿಸದ ಕಾಂತಿಯು
ನಿತ್ಯ ನಿರ್ಮಲ ಮನ ಶುದ್ಧಿಗಳು
ಭಕ್ತಿಯು ನಿನ್ನೊಳು ಸಮನತೆ ಜನರೊಳು
ಪುಟ್ಟಿಸು ಜನಕಜೆ ಹೃದಯದೊಳು
*****

ಜನಕಜೆ
Latest posts by ಜನಕಜೆ (see all)