ಆಪವೆನಿಪುದು ನೀರು ಅದರಿಂಳಿಳಮಾನವಕೋಟಿ ಜನಿಸಿತು |
ಆಪಸಾಗರನಾಯ್ತು ನಾರಾಯಣ ಗಧಿಷ್ಠಾನಾ ||
ಆದಿಯೋಳಂಡದೊಳು ಗರ್ಭಿತಮಾಗಿ ಹರಿ ತಾಸಮಾಧಿಯೊಳಗಿರೆ
ಆದಿಲಕುಮಿಯು ಪ್ರಕೃತಿದೇವಿಯು ಪತಿಯ ಬಳಿಸಾರೆ || ೧ ||
ಆಗಲಾಗೆ ಸಮಾಧಿ ಭಂಗವು ಅಂಡಶೀಳಿತು ಅದರೊಳಿಹ ಹರಿ |
ನಾಭಿಯಿಂದಲಿ ಕಮಳವೆದ್ದಿತು ಮೇಲೆ ತಾನಾಗ ||
ಆಗಜಿಗಿಯಿತು ಮೂಲಜೋತಿಯು ಆಗಸದಿ ನೇಸರನಾಗಿ ಹೊಳೆಯಿತು |
ಆದಿನಾರಾಯಣನು ತನ್ನಯ ಲೀಲೆ ಪೂಡಿದನು || ೨ ||
ಕಮಳದಹೊಳ್ತಾವಿಧಿಯರೂಪದಿ ಹೊರಟ ತೇಜವು ನಾಲ್ಮೊಗವಪಡೆಯುತೆ |
ಕಮಳಸಂಭವನಾಗಿ ತೋರುತೆ ಸೃಷ್ಟಿ ನಿರ್ಮಿಸಿದ ||
ಪ್ರಕೃತಿಯಿಂ ಘಟಗಳನು ನಿರ್ಮಿಸಿ ಆತ್ಮರೂಪದ ತೇಜವದರೆೊಳು |
ವಿಕೃತಿಪೊಂದದೊಳಿರಿಸಿ ಜೀವನ ರಾಶಿ ಪುಟ್ಟಿಸಿದಾ || ೩ ||
ಪ್ರಕೃತಿರೂಪದ ಪೆಣ್ಣಿನ್ನೋಳ್ಹರಿ ಪುರುಷರೂಪದಿ ಮಿಳತನಾಗಲು |
ಪ್ರಕೃತಿ ಪುರುಷರ ಮಿಲನ ಲೀಲೆಯೆ ವಿಶ್ವವಿಸ್ತಾರಾ ||
ಪ್ರಕೃತಿ ರೂಪದ ಪೆಣ್ಣು ಕ್ಷೇತ್ರವು ಪುರುಷರೂಪದಿ ತೇಜ ಪಡೆಯುತೆ |
ಸಕೃತದೊಳ್ಫಲವೀಯೆ ಮಾನವ ಕೋಟಿ ಜನಿಸುವುದೂ || ೪ ||
ಪೆಣ್ಣು ಅಲ್ಲವೆ ನಮ್ಮಪೆತ್ತಿಹ ಮಾತೆ ಜಗದೊಳು ನಮ್ಮಪೊರೆದಳು |
ಪೆಣ್ಣ ಮಹಿಮೆಯನರಿಯೆ ಪಡೆವವು ನಿತ್ಯಸೌಖ್ಯಗಳಾ ||
ಪೆಣ್ಣು ಪ್ರಕೃತಿಯರೂಪು ಶ್ರೀಹರಿ ಪ್ರಿಯಳುಯೆನಿಸಿದಳಾದಿಲಕ್ಷ್ಮಿಯು |
ಪೆಣ್ಣನೆಂದಿಗು ಬೀಳುಗೆಡಹದೆ ನಡೆಯೆನಿಜಸುಖವೂ || ೫ ||
ಪೆಣ್ಣು ಪಾರ್ವತಿರೂಪುತಾಳುತೆ ಬಳವಕೊಡುವಳು ನಿತ್ಯಮನುಜಗೆ ।
ಪೆಣ್ಣು ಲಕುಮಿಯ ರೂಪಿರಿಂದಲಿ ಧನವನೀಡುವಳೂ ||
ಪೆಣ್ಣು ಸರತಿಸಯಾಗಿ ಬಿಜ್ಜೆಯ ಪೊಳೆಯ ಜಗದೊಳು ಹರಿಸಿಯದರಾ |
ಹಣ್ಣು ಸವಿಯುತೆ ನರನು ಪಡೆವನು ಸೌಖ್ಯ ಇಹಪರವಾ || ೬ ||
ಪೆಣ್ಣು ಮೋಹಿನಿಯಾಗಿ ಹರಿದಾನವರ ನಾಶವಗೈದ ಪೂರ್ವದಿ।
ಪೆಣ್ಣು ದುರ್ಗೆಯು ಕೃಷ್ಣಭಗಿನಿಯು ಜಗದಿ ಮೆರೆಯುತ್ತೆ ||
ಪೆಣ್ಣು ಶಾಕಂಬರಿಯು ಭೀಕರ ರೂಪುತಾಳುತೆ ದುಟ್ಟರಕ್ಕಸ- |
ರನ್ನುಸದೆದಳು ಶಕ್ತಿಯೆನಿಸುತೆ ತಾಯಿ ಮಹಕಾಳೀ || ೭ ||
ಪೆಣ್ಣು ಸೀತಿಯು ಘೋರ ರೂಪವತಾಳಿ ಶತಶಿರನನ್ನು ಕೊಂದಳು |
ಪೆಣ್ಣು ಶಾರದೆವಾದಕೆಳೆದಳು ಮುನಿಯ ಶಂಕರನ ||
ಪೆಣ್ಣಿನಕತದಿಂದೆ ರಾಮಾನುಜನು ಯತಿವರನಾದುದದರಿಂ |
ಪೆಣ್ಣು ಜಗದೊಳು ಮಾಡಲಾಗದ ಕಾರ್ಯ ತಾನಿಲ್ಲಾ || ೮ ||
ನುಣ್ಣವೆನಿಪಾ ಕ್ರೈಸ್ತಧರ್ಮವ ಜಗದಿ ಹರಡಿದಯೇ ಶುಪ್ರಭುತಾ |
ಪೆಣ್ಣು ಮೇರಿಯ ದಯದಿಮೆರೆದನು ಸರ್ವದಿಶೆಯಲ್ಲಿ ||
ಪೆಣ್ಣಿನ ಮೋಹಕ್ಕೆ ಹೇಸುತೆ ತ್ಯಜಿಸಿ ಸಂಸಾರವನು ಗೌತುಮ |
ಘನ್ನಮುನಿವರ ಬುದ್ಧನೆನಿಸುತೆ ಮೆರೆದ ವಿಶ್ವದೊಳೂ || ೯ ||
ಪೆಣ್ಣುಮಣಿ ರೇಝಿಯಳು ತನ್ನಯ ಬುದ್ಧಿಕೌಶಲದಿಂದಲಾಳ್ದಳು |
ಪೆಣ್ಣುರಾಣಿಯ ನೂರಜಹನಳ ಸಮರು ಯಾರಿಲ್ಲಾ |
ಪೆಣ್ಣು ಮಣಿಮಾಲೆಯಲಿ ಪೊಳೆವರು ಚನ್ನೆಚನ್ನಮ್ಮಾದಿ ಸತಿಯರು |
ಪೆಣ್ಣು ಪ್ರಾಂತವನಾಳಿ ಪೋದಳು ಸರೋಜಳೆಂಬವಳೂ || ೧೦ ||
ಘನ್ನ ಕೀರ್ತಿಯ ಪಡೆದಹಲ್ಯಯ ದ್ರುಪದಪುತ್ರಿಯಸೀತೆ ತಾರೆಯ |
ಚನ್ನೆಮಂದೊದರಿಯ ಸ್ಮರಣೆಯಮಾಡೆ ಪಾಪಗಳೂ ||
ಇನ್ನುನಾಶವ ಪಡೆದು ಮನುಜನು ಸನ್ನ ಸದ್ಗತಿಪಡೆದುತಾ ನತಿ |
ಘನ್ನಸಂತಸದಿಂದೆ ಮೆರೆವನು ನಿಯತಸಗ್ಗದೊಳೂ || ೧೧ ||
ಪೆಣ್ಣು ವಿರಹಿತ ಮನೆಯು ಪಾಳ್ಗುಡಿ ಪೆಣ್ಣು ಇರ್ದೊಡೆ ದೇವಮಂದಿರ |
ಪೆಣ್ಣು ಮನೆಯ ಲಕುಮಿಯೆನಿಪಳು ಸದ್ಗತಿಯ ತೋರಕಳೂ ||
ಪೆಣ್ಣು ಮುನಿದೊಡೆ ಮಾರಿಯಾಗ್ವಳು ಪೆಣ್ಣು ವೊಲಿದೊಡೆ ಶ್ರೇಯ ತರುವಳು||
ಪೆಣ್ಣು ಸರುವರ ಹೆಮ್ಮೆ ಕುಲದೇವತೆಯು ಯೆನಿಸಿಹಳೂ || ೧೨ ||
ಪೆಣ್ಣು ಸನ್ಮಾರ್ಗದೊಳೆ ಇರ್ದೊಡೆ ತನ್ನ ಕುಲಕೋಟಿಯನು ಮೆರೆವಳು |
ಪೆಣ್ಣು ವಾಮದ ಮಾರ್ಗ ಪಿಡಿದೊಡೆ ಹಾಳುಗೆಡಹುವಳೂ ||
ಪೆಣ್ಣಿಗೆ ಪತಿದೇವನೆನಿಪನು ಪೆಣ್ಣು ಗಂಡನ ಮಂತ್ರಿಯೆನಿಪಳು |
ಪೆಣ್ಣ ಬೀಳ್ದೊಡೆ ನಿಯತನನರಕವು ನರಗೆ ಶಾಶ್ವತವೂ || ೧೩ ||
*****
