ಗಳಿಗೆಬಟ್ಟಲ ತಿರುವುಗಳಲ್ಲಿ – ೧೨೭
ಹಸಿವು ರೊಟ್ಟಿಗಳು ಒಂದಕ್ಕೊಂದು ಪೂರಕ ಹೀಗೆಂದೇ ಒಂದನ್ನೊಂದು ನಿಯಂತ್ರಿಸುತ್ತವೆ. ರೊಟ್ಟಿ ಅಪೂರ್ಣವಾದರೆ ಹಸಿವೂ ಅಪೂರ್ಣ ಹಸಿವು ಪೂರ್ಣವಾದರೆ ರೊಟ್ಟಿ ಪರಿಪೂರ್ಣ. *****
ಗಳಿಗೆಬಟ್ಟಲ ತಿರುವುಗಳಲ್ಲಿ – ೧೨೬
ಹಸಿವಿನ ನಿರಂಕುಶಕ್ಕೆ ಭಾಷೆ ಇಲ್ಲ ಅರ್ಥವಿಲ್ಲ ವಿವರಣೆಯೂ ಇಲ್ಲ ಅನುಭವ ವೇದ್ಯ. ರೊಟ್ಟಿಯ ಘನತೆಗೆ ಬೆಲೆಯಿಲ್ಲ ಅಳತೆಯಿಲ್ಲ ಅಸ್ತಿತ್ವವೇ ನಗಣ್ಯ. *****
ಗಳಿಗೆಬಟ್ಟಲ ತಿರುವುಗಳಲ್ಲಿ – ೧೨೫
ಬಾಳಲಾಗದ ಬಾಳಬಾರದ ವೇದಾಂತ ಸಿದ್ಧಾಂತ ಮೂಗಿನ ನೇರದ ತತ್ವಜ್ಞಾನ ಅವರಿವರ ಉಪದೇಶಾಮೃತ ಕೇಳಿ ಕೇಳಿಯೇ ರೊಟ್ಟಿ ಹಸಿವಿನ ಜಗಳ ಜೀವಂತ. *****
ಗಳಿಗೆಬಟ್ಟಲ ತಿರುವುಗಳಲ್ಲಿ – ೧೨೪
ರೊಟ್ಟಿ ಹಸಿವಿನ ನಡುವೆ ಒಂದು ನಿಗೂಢ ಕಾಲುವೆ. ಗುಪ್ತಗಾಮಿನಿಯೊಡಲಲ್ಲಿ ಹಾಗೇ ಸುಪ್ತವಾಗಿದೆ ಖಾಸಗಿ ಕ್ಷಣಗಳು. ಅವರು ಸಾಕ್ಷಿ ಕೇಳುತ್ತಾರೆ ರೊಟ್ಟಿ ಹಸಿವು ಒಳಗೇ ನಗುತ್ತವೆ. *****
ಗಳಿಗೆಬಟ್ಟಲ ತಿರುವುಗಳಲ್ಲಿ – ೧೨೩
ಹಸಿವು ತಣಿಯಲು ರೊಟ್ಟಿ ರೊಟ್ಟಿ ಅರಳಲು ಹಸಿವು ಕಾರ್ಯಕಾರಣ ಸಂಬಂಧ ಸೃಷ್ಟಿ ನಿಯಮ. ರೊಟ್ಟಿ ಹಸಿವಿನ ಹಾದಿ ಪ್ರತ್ಯೇಕವಾಗಿಯೂ ಏಕ. *****
ಗಳಿಗೆಬಟ್ಟಲ ತಿರುವುಗಳಲ್ಲಿ – ೧೨೨
ಹಸಿವು ಸೋಲುವುದಿಲ್ಲ ರೊಟ್ಟಿ ಗೆಲ್ಲುವುದಿಲ್ಲ ಪಂದ್ಯವೆಂಬ ಭ್ರಮೆ ಹಸಿವು ರೊಟ್ಟಿಗೆ. ಆದರಿಲ್ಲಿ ಸೋಲು ಗೆಲುವುಗಳಿಲ್ಲ ದಾಖಲಾಗುವುದಿಲ್ಲ ಚಕ್ರ ತಿರುಗುತ್ತದೆ ರೊಟ್ಟಿ ಹಸಿವು ಕೈ ಹಿಡಿದು ಸುತ್ತಬೇಕಿದೆ ಜೊತೆ ಜೊತೆಗೇ. *****
ಗಳಿಗೆಬಟ್ಟಲ ತಿರುವುಗಳಲ್ಲಿ – ೧೨೧
ಬೀಗಬಾರದ ರೊಟ್ಟಿ ಬಾಗಲಾರದ ಹಸಿವು ರೊಟ್ಟಿ ಪ್ರಶ್ನಿಸುವಂತಿಲ್ಲ ಹಸಿವು ಉತ್ತರಿಸಬೇಕಿಲ್ಲ ಯಥಾಸ್ಥಿತಿಯ ಗತಿಯಲಿ ರೊಟ್ಟಿಗೆ ಮುಖವಾಡದ ಮೇಲೆ ಮುಖವಾಡ ಹಸಿವಿಗೆ ಗೆಲುವಿನ ಠೇಂಕಾರ. *****
ಗಳಿಗೆಬಟ್ಟಲ ತಿರುವುಗಳಲ್ಲಿ – ೧೨೦
ಹಸಿವಿನಲಿ ರೊಟ್ಟಿ ರೊಟ್ಟಿಯಲಿ ಹಸಿವು ಅಗೋಚರದಿ ನೆಲೆಸುವಂತೆ ಹಸಿವಿನೆತ್ತರ ರೊಟ್ಟಿಯಾಳದ ನಡುವೆ ಕವಿತೆಯ ರಾಯಭಾರ. *****
ಗಳಿಗೆಬಟ್ಟಲ ತಿರುವುಗಳಲ್ಲಿ – ೧೧೯
ಹಸಿವಿನ ಆಯ್ಕೆ ರೊಟ್ಟಿ. ಆದರೆ ರೊಟ್ಟಿ ಸೃಷ್ಟಿಯಾಗುವುದು ಆಯ್ಕೆಯಿಂದಲ್ಲ ಅನಿವಾರ್ಯತೆಯಿಂದ. ಅದಕ್ಕೆ ಆಯ್ಕೆ ಇದ್ದರೆ ರೊಟ್ಟಿಯಾಗುತ್ತಿರಲಿಲ್ಲ. ಹಸಿವಂತೂ ಆಗುತ್ತಿರಲೇ ಇಲ್ಲ. *****
ಗಳಿಗೆಬಟ್ಟಲ ತಿರುವುಗಳಲ್ಲಿ – ೧೧೮
ರೊಟ್ಟಿ ಕಲಿಯಬೇಕಿರುವ ಮೊದಲ ಪಾಠ ‘ಹಸಿವಗೇನು ಬೇಕು?’ ಎಂಬುದು. ಮತ್ತು ಕೊನೆಯ ಪಾಠವೂ ಅದೇ. *****