ಆಕಾಶ ತುಂಬೆಲ್ಲ ನಕ್ಷತ್ರಗಳಾ ಬೀಜ
ಬಿತ್ತಿದವರಾರೆ ಗೆಳತಿ-
ನೋಡ ನೋಡ ಬೆಳೆ ಹೊಳೆಹೊಳೆವ ಮಣಿಗಳಾ
ಸುತ್ತೋಣ ಬಾರೆ ಗೆಳತಿ
ದಿಕ್ಕು ದಿಕ್ಕಿಗೂ ಕತ್ತೆತ್ತಿ ನೋಡಿದರ
ನಗತಾವ ನೋಡ ಗೆಳತಿ-
ಫಳಫಳಿಸುವಾ ವಜ್ರಗಳಾ ನೋಡು ನೋಡುತಿರೆ
ಕಿವಿಯೋಲೆ ಸರಗಳಾದಾವು ಗೆಳತಿ
ಚಂದ್ರನೊಬ್ಬ ತಾರೆಗಳು ಸುತ್ತ
ಆಕಾಶ ಭಿತ್ತಿ ಮೇಲೆ-
ಬಿಳಿಅಂಗಿ ತೊಟ್ಟು ಬಂದಿಹನು ಆತ
ಕನ್ಯ ನೋಡಲೆಂದು
ಅವನೇನುಚಂದ ಅವರೇನು ಅಂದ
ಮನದಾಗ ಜಾಜಿ ಮಕರಂದ-
ಗತ್ತಿನಾ ಚಂದಿರ ಬೆಡಗಿನಾ ಹುಡುಗಿಯರ
ಸುತ್ತಾಟ ನೋಡ ನೋಡ ಗೆಳತಿ
ಹುಡುಹುಡು ಹುಡುಕಿದಾ ಹುಡುಗಿಯ
ಕಲಕಲ ಕಲಕಿದಾ ಹುಡುಗಿಯರ
ನೋಡು ನೋಡಲ್ಲಿ ತಾರೆಗಳ ದಿಬ್ಬಣ
ನೋಡು ನೋಡಿಲ್ಲಿ ಸಮುದ್ರಗಳಾ ಸಾಕ್ಷಿ
ಬಾ ಬಾ ಬಾರೆ ಗೆಳತಿ ಬಾನಂಗಳಕೆ ಜಿಗಿದು
ಸುತ್ತೋಣ ಬಾರೆ ಗೆಳತಿ.
ಚಂದ್ರ ಚುಕ್ಕಿಯರಿಗೆ ಪಂಚಮವ ಹಾಡಿ
ಮರಳೋಣ ಬಾರೆ ಗೆಳತಿ
*****
