ನನ್ನ ಜೀವವರ್ತುಲಕೊಂದೆ ನಾನೆ ಅಮೃತ ಬಿಂದು
ನನ್ನ ನಭೋಮಂಡಲಕೆ ನಾನೆ ಭಾನು ಇಂದು
ನನ್ನ ಮನದ ಸರಸಿನೊಳೆಲ್ಲ ನಾನೆ ಮೀನ ಮೀಯು
ನನ್ನ ಬಸಿರ ಬಯಲಿನಲಿ ನಾನೆ ಪ್ರಾಣವಾಯು
ಹಕ್ಕಿಯಾಗಿ ಹಾರುತಲಿರುವೆ ನನ್ನ ತೋಟದಲ್ಲಿ
ಸೊಕ್ಕಿದ ಗಜ ಧುಮಕುವೆ ನಾ ನನ್ನರಣ್ಯದಲ್ಲಿ
ಕಲ್ಪನಲತೆ ಕುಸುಮ ನಾನು ಅರಳಿ ಮರಳಿ ಅರಳುವೆ
ಶಿಲ್ಪಿ ನಾನು ನನ್ನ ಕಲೆಯ ಮೈಯ ಮೂರ್ತಿ ನಿಲಿಸುವೆ
ತರಂಗ ತಾನ ಗಾನವು ನಾ ನನ್ನ ಗೀತಗಾನಕೆ
ತುರಂಗ ಭಂಗಿ ಗತಿಯು ನಾ ನನ್ನ ದೇಹ ಯಂತ್ರಕೆ
ಮನಸಿನುಯ್ಯಾಲೆಯಾಗಿ ತೂಗುತಿಹೆನು ನಾ
ಮನದ ಮನಸಿನೊಳಗೆ ಮಿನುಗಿ ಬೆಳಗುತಿಹೆನು ನಾ
ಬೆಳಕಿನಿಂದ ಬಾಳ ಬೆಳೆಯ ಬೆಳೆಸುತಿಹೆನು ನಾ
ತಿಳಿವಿನ ಫಲವಾಗಿ ಬಾಳಿ ಫಲಿಸುತಿಹೆನು ನಾ
*****
