೧
ಕೋಗಿಲೆ ಕುರೂಪಿಯೆನೆ, ರಾಗದಲಿ ಹಾಡುತಿಹ
ಮಧುರ ಸಂಗೀತವಶ್ರಾವ್ಯವಹುದೇನು?
ಭಾವ-ರಸ ಬೆರೆದಿರುವ ಕೋಗಿಲೆಯ ಸವಿ ಸರವ
ಕೇಳೆನೆಂದಾರಾದಕೊರೆಯುತಿಹರೇನು?
೨
ಮಾಮರದ ಕೊಂಬೆಯಲಿ ಮಾಂದಳಿರ ಮೆಲ್ಲುತ್ತ,
ನವ ವಸಂತನ ಗಾನ ಗೈವ ಕೋಗಿಲೆಯು,
ಆಗೊಮ್ಮೆ ಈಗೊಮ್ಮೆ ‘ಕುಹೂ-ಕುಹೂ’ ಎಂದು
ಮಧುರ-ಮಂಜುಲ ಕಂಠದಿ೦ದುಲಿಯುತಿಹುದು.
೩
ಒ೦ದೆ ಹಾಡಿನೊಳೆನಿತೊ ಭಾವವನು ಬಿಂಬಿಸುತ,
ಮನವ ರಂಜಿಸುತಿರುವ ಪಿಕವು ವರಕವಿಯೊ?
ಅಲ್ಲದಿರೆ ಶಾರದೆಯು ವರದ ಹಸ್ತವನಿದರ
ಮಸ್ತಕದ ಮೇಲಿಟ್ಟು ಹರಸಿರುವಳೇನೊ?
೪
ಒಂದೊಮ್ಮೆ ಪಿಕದುಲಿಯು ಮಾನವರ ಕಿವಿದೆರೆಗೆ
ಕೇಳಿದರೆ ಹೃದೆಯಾಬ್ಧಿ ವೀಚಿಯಾಡುವುದು.
ಮಧುಮಾಸದಲಿ ಮೆರೆವ ಕೋಗಿಲೆಯು ಸಾಮಾನ್ಯ
ಪಕ್ಷಿಯಲ್ಲದು ಮಧುರ ಗಾನ ದೇವತೆಯು!
*****
೧೯೪೩
