೧
ಇನಿತೇಕೆ ತೊಳಗುವಿರಿ ತಾರೆಗಳೆ! ನೀನಿಂತು?
ಆರ್ಗೆ ಹೊರಗೆಡಹುವಿರಿ ಸೌಂದರ್ಯ ಸುಧೆಯಂ?
ನಿಮ್ಮ ಚೆಲುವನು ಕಂಡು, ಭವದ ಬವಣೆಯ ಮರೆತು,
ಓರ್ಚಣನನಾದರೂ ಸೊಗವಡುವನಾವಂ?
೨
ನೇಸರಾರಲು, ಮಬ್ಬಿನುಬ್ಬೇರೆ, ಬಾಂಬಯಲೊ-
ಳೊಗೆದು ಕಣ್ ಬಿಡುತಿಹಿರಿ ಬೆಳ್ಪಿನಗೆಯಂತೆ:-
ಕಗ್ಗತ್ತಲೆಯ ಕರಿಯ ಸೀರೆಯಲಿ ಬೆಳ್ವೊನ್ನ
ಮಿರು ಮಿರುಗುವಲರನ್ನು ಕೇವಣಿಸಿದಂತೆ.
೩
ಇರುಳ ನೀರೆಯ ಮುಡಿಗೆ ತೆತ್ತಿಸಿದ ಬಜ್ಜರದ
ಪರಲುಗಳ ಪಂಗಿನಲಿ ಪೊಂಗಿ ನೀವಿಹಿರಿ.
ದೇವನೊಲುಮೆಯ ಜಾಣ್ಮೆಯದ್ಭುತದ ಕೈಕ ಚಳಕ-
ದೊಂದು ಕೈಪಿಡಿಯ ಪ್ರತೀಕದಂತಿಹಿರಿ.
೪
ನಿಮ್ಮಮಿತ ಲಾವಣ್ಯ ಲಹರಿಯನು ಪದೆದೀಂಟಿ,
ನಿಶ್ವ ವೈಚಿತ್ರ್ಯಾಬ್ಧಿಯಲ್ಲಾವನಾಳ್ವಂ?
ಮನೆಯಿಂದ ಹೊರಬಂದು, ಕತ್ತನ್ನು ಮೇಲೆತ್ತಿ,
ಚುಕ್ಕೆಗಳೆ! ನಿಮ್ಮ ಚೆಲುವನು ನೋಳ್ಪನಾವಂ?
*****
೧೯೪೪
