ಏನೂ ಮಾಡದೆ

ಏನೂ ಮಾಡದೆ ಏನೂ ತಡೆಯದೆ
ನಾ ನೋಡುತ ಇದ್ದೇನೆ
ಹೋದವರಾರೂ ಬಂದೇ ಇಲ್ಲ
ಬಂದವರಿಗೊಂದೂ ಗೊತ್ತೇ ಇಲ್ಲ

ನಾ ನೋಡುತ ಇದ್ದೇನೆ
ಏನೂ ಮಾಡದೆ ಇದ್ದೇನೆ

ವಾಹನ ಹೊರಟಿವೆ ಎಲ್ಲಿಗೊ ಸ್ವಾಮಿ
ಹಾರುವ ಹಕ್ಕಿ ಆಡುವ ಕೀಟ
ಹರಿಯುವ ನದಿ ಹರಿಯುತ್ತಲೆ ಇದೆ
ಗಾಳಿಗೆ ಎಲೆಗಳು ಉದುರುತ್ತಲೆ ಇವೆ

ನಾ ನೋಡುತ ಇದ್ದೇನೆ
ಏನೂ ಮಾಡದೆ ಇದ್ದೇನೆ

ಮಳೆ ಸುರಿಯುತಿದೆ
ಮೋಡವು ಮುಗಿಯುತಿದೆ
ಏಳುತ್ತಲೆ ಇವೆ ನೀರ ಗುಳ್ಳೆಗಳು
ಏಳುತ್ತಲೆ ಅವು ಸಾಯುತ್ತಲು ಇವೆ

ನಾ ನೋಡುತ ಇದ್ದೇನೆ
ಏನೂ ಮಾಡದೆ ಇದ್ದೇನೆ.

ಕಂತುವ ಸೂರ್‍ಯನು ಬೀಳುವ ತಾರೆ
ಸುತ್ತಲು ಹರಡುವ ಭಾರೀ ಕತ್ತಲು

ನಾ ನೋಡುತ ಇದ್ದೇನೆ
ಏನೂ ಮಾಡದೆ ಇದ್ದೇನೆ

ಒಂದರ ಹಿಂದೊಂದು ಕನಸುಗಳೆದ್ದು
ನಿಲ್ಲದ ತಿರುಗಣೆ ಮಡುವಲಿ ಬಿದ್ದು
ನೆನಪುಗಳೆಲ್ಲಾ ಕಲಸಾಗುತ್ತಿವೆ
ಸ್ಮೃತಿ ವಿಸ್ಮೃತಿಗಳು ಒಟ್ಟಾಗುತ್ತಿವೆ

ನಾ ನೋಡುತ ಇದ್ದೇನೆ
ಏನೂ ಮಾಡದೆ ಇದ್ದೇನೆ

ಪದಕಾರರು ಪದಗಳ ನುಡಿಸಿ
ಭಾಷೆಗೆ ವಚನದ ದೀಕ್ಷೆಯ ಕೊಡಿಸಿ
ಋಷಿ ಮುನಿಗಳು ಮಂತ್ರವ ಪಠಿಸಿ
ದೇಹದ ಬಂಧನದಿಂದಾತ್ಮವ ಬಿಡಿಸಿ

ನಾ ನೋಡುತ ಇದ್ದೇನೆ
ಏನೂ ಮಾಡದೆ ಇದ್ದೇನೆ
*****