ಎಂದೂ ಒಪ್ಪಿಸಬೇಡ ಯಾವ ಹೆಣ್ಣಿಗೂ ನಿನ್ನ ಹೃದಯ ಪೂರಾ.
ಖತವೆನಿಸಿತೊ ಪ್ರೀತಿ, ಭಾವೋದ್ರಿಕ್ತ ಹೆಣ್ಣುಗಳು
ಚಿಂತಿಸುವ ಅಗತ್ಯವನ್ನೆ ಎಳ್ಳಷ್ಟೂ ಕಾಣರು,
ಒಂದೊಂದು ಮುತ್ತಿಗೂ ಪ್ರೇಮ ಮಂಕಾಗುತ್ತ
ತೀರಿಕೊಳ್ಳುವುದೆಂದು ಕನಸಲ್ಲೂ ತಿಳಿಯರು,
ಸುಂದರವಾದದ್ದೆಲ್ಲ ಸಣ್ಣ ಅವಧಿಯ ಸ್ವಪ್ನಸದೃಶ ದಿವ್ಯಾನಂದ.
ಅಯ್ಯೋ ಒಪ್ಪಿಸಬೇಡ ಹೃದಯವನ್ನೆಂದಿಗೂ
ಥಟ್ಟನೊಂದೇ ಸಲ.
ಜಾಣೆಯರು ಏನೆ ಹೇಳಲಿ, ತಮ್ಮ ಹೃದಯಗಳ
ಬಿಟ್ಟುಕೊಟ್ಟಿದ್ದಾರೆ ಕುಣಿಸಲಿಕ್ಕೆ.
ಪ್ರೇಮದಲಿ ಕಿವುಡಾಗಿ ಮೂಕಾಗಿ ಕುರುಡಾಗಿ
ಕೂತರಾದೀತೆ ಅದ ನುಡಿಸಲಿಕ್ಕೆ?
ಇದನಾಡುವವ ಬಲ್ಲ ಅದರ ಬೆಲೆಯೆಲ್ಲ.
ತನ್ನ ಹೃದಯವ ಹುಚ್ಚ ಸಾರಾಸಗಟು ತೆತ್ತು ಕಳಕೊಂಡನಲ್ಲ!
*****
ಮೂಲ: ವಿಲಿಯಂ ಬಟ್ಲರ್ ಏಟ್ಸ್
