ಹಗಲೆಲ್ಲ ದೃಶ್ಯಕಾವ್ಯ
ಮುಖಾಮುಖಿ ಮಾತು ಚಲಾವಣೆ
ಮನೆ ಸಂತೆಪೇಟೆ ರಾಜಕೀಯ
ಕಾಡುಮೇಡು ಆಕಾಶ ಸಮುದ್ರದವರೆಗೆ
ದುಡಿದು ಬೆವರಿಳಿಸಿದವರ ಅರೆಹೊಟ್ಟೆಮಾತು
ಬಿರಿದ ಹೊಟ್ಟೆಯವರ ಭ್ರಷ್ಟಾಚಾರದ ಮಾತು
ಹೃದಯಮಾತಿಗೆಲ್ಲಿ ದೃಶ್ಯಕಾವ್ಯ.
ರಾತ್ರಿಗೆ ಕತ್ತಲೆಕಾವ್ಯ
ರಾತ್ರಿರಾಣಿಯರ ಗೋಳಾಟದ ಕಥೆ ಕಾದಂಬರಿ
ಒಮ್ಮೊಮ್ಮೆ ಮಹಾಕಾವ್ಯ
ಭಾರವಾದರೆ ಬೆಳಗಾಗುವುದರೊಳಗೆ ಚುಟುಕು;
ಕಳ್ಳರಿಗೆ ನಾನಾವತಾರದ ವೇದಿಕೆ
ರಾಕ್ಷಸೀ ಚಟುವಟಿಕೆ
ದುಃಸ್ವಪ್ನ ಬೀಭತ್ಸ ಭಯಾನಕ
ಮನಗಳ ನಿದ್ರೆಗೆ ನಿಶ್ಯಬ್ದದಾವರಣ.
ಹಗಲುರಾತ್ರಿಗಳ ನಿರಂತರ ಚಲನೆಗೆ
ಸೂರ್ಯಚಂದ್ರ ಚಿಕ್ಕೆಗಳ ಕಳ್ಳಾಟ ಮಳ್ಳಾಟ ಸುತ್ತಾಟ.
ಭೂಮಿ ಆಕಾಶ ಗಾಳಿ ನೀರು ಬೆಂಕಿ
ಪಂಚಭೂತಗಳ ಚೊಕ್ಕ ಲೆಕ್ಕಾಚಾರ.
ಹುಲುಮಾನವ ಮಹೋದಯರಿಗೆ ಜೀವನ್ಮರಣದ
ಸೋಲುಗೆಲವುಗಳ ಚೌಕಾಬಾರದಾಟ.
*****
